Moin leev Lüüd,
ik heff den Sprök „Platt is bunt“ ja al oft brukt. Un dat stimmt ok. Plattdüütsch leeft! Narichten op Platt in’t Radio, Hafenrundfahrt op Platt, Plattdüütsch in de Schoolen or ok plattdüütsche Musikwettbewerbe – Plattdüütsch leeft! Un darto heff ik in dissen Rundbrief den een or annern Infokram tosamendrogen. Mehr anzeigen
Kiekt mal bi de Rubrik Leder. Veel Spaaß bi’t Lesen un Tohöörn wünscht
Plattdüütsch leeft
„Havenrundfohrten op Plattdüütsch“
„Besöker, de Platt leevt or lehrn will, köönt Hamborg sien Hafen mal op en ganz annere un ünnerhaltsame Aart beleven. Dat gifft nu ok en niegen Audioguide vun de Reederei Abicht un dat Ohnsorg-Theater, mit den een en Hafenrundtoor op Plattdüütsch maken kann. Disse Idee hölpt dorbi, dat de Spraak lebennig bleevt. Un so höört sik dat denn an:
Podcast: Narichten op Platt
Un ok de Narichten ut Hamborg un de wiede Welt könnt ji jümmers vun maandaags bet sünnavends in´t Radio -NDR 90,3 | Narichten op Platt | Klock halbig thein (09:30) bi : Narichten op Platt hören. De aktuellen Nachrichten vun Sünnavend de 13. September weern düt mal u.a. ok ut Eidelsteed: Mehr anzeigen
Hamburger Abendblatt
So schäädlich sünd Pumps würklich för de Fööt“, as een Överschrift in’t Hamburger Abendblatt in August seggt. Un denn de Text. Dat weer keen Överraschen. Klor, in Pumps sünd de Fööt wohrhaftig nich optimal afpasst. „Man mutt nich jede Mood mitmaken“, seggt dor een Doktersche. Gliektiedig hett se aver ook veel Bedacht för Fruens, de geern mal in Pumps rümloppt. Un dat hett uns Snackereen Silke domals as jung Deern ok wullt. Leest man mal ehr
Gedanken op Platt:
Hoge Hacken, schädlich för de Gesundheit. Ik, 1955 Teenager 15, Johr old — Elvis-Bill Harley -Rock ‘n‘ Roll. Un denn de ersten witten Schöh mit hoge Hacken. Ik harr mien egen Geld – nich von Oma orrer so, nee, sülvst verdeent. Ik heff dat Hamburger Abendblatt to de Lüüd bröcht. Tja, un denn heff ik öövt mi mit de Dinger ok to bewegen. Op unsen Plattenweg rund um dat Huus, und dat weer nich so eenfach. Bün jümmers ümknickt mit de Dinger. Ober „Gut Ding braucht Weile“ un mien Fründin weer de Jury. To de hogen Hacken harr ik de ganz niege Kleedosch ut Amerika an. 4/5 Petticoats, den breden Smachtgürtel. Un ab güng de Post. No’n kotte Tiet hebbt wi allen Moot tosomennohmen un sünd den Schiffbeker Weg op un dol gohn. MIT ERFOLG. Veele Autos geev dat jo noch nich, ober se hebbt all op de Hupe drückt un villicht wat ut Fenster ropen. Wi weern so wat von stolt un hebbt rumalbert. Lang hett dat nich duert, denso keem mien Mudder as so’n Furie üm de Eck, de Nobersche harr petzt, un allens weer vörbi. Nu, veele Johren loter, knackt dat an de een orrer anner Stell. Ober wat hett Hildchen Knef dorto sungen: „Aber schön war es doch …“
Silke Frakstein
Veranstalten / Tieden
Gesnuttelt ward an 16. Oktober, Klock söss, in Lichtwarksaal, Neanderstraße 22, 20459 Hamburg. Nu man gau to düsse Veranstaltung anmellen. Dat köst ok nix. Anmeldeformular
De Plattsnacker dreept sik wedder an’n Middeweeken, 08 Oktober, Klock söss, in dat Huus vun de Elisabeth Kark, Eidelstedter Dorfstraße. Wi freit uns op jeedeen, de uns Sprook leevt. Du bruukst nich perfekt sien, wi öövt allemann noch.
Dit un Dat
Leder
Sänger as Hein Köllisch, de ,,Gebrüder“ Wolf oder Charly Wittong hebbt in Hamborg dat Couplet bannig bekannt maakt. Se hebbt plattdüütsche Texte to’n Högen op Slagermelodien schreven un spöttsch or ok mal en beten swiensch dat Leven un de Lüüd in Hamborg op’n Liem nahmen. Dat weren unner anneren Vöroordele över Lüüd ut de enkelten Stadtdele, Szenen ut den Alldag, Berop or Festdogen. Höört mal de Hamburger Stadtbummel as Originalopnahme vun 1932 mit de Gebrüder Wolf:
Plattdüütsch in de Kark
Dat is all lang en goot Tradition bi uns in Eidelsteedt. Twemal in’n Johr gifft dat en Plattdüütsch Gottsdeenst. Dor sünd denn ok en poor Lüüd ut unsern Kring as Lektoren dorbi. So ok ditmal an 21. September. Un doröver hett dat denn en lütten Bericht in’t Radio bi 90,3 geven. Höör mal beten to:
Un to´n Enn noch en lütt „Fundsaak“:
Plattdüütsch is nich blots för ‚ole‘ Lüüd. In Mekelnborg-Vörpommern lehrt 1.700 Schölers in Kursen or in’n regulären Ünnerricht Plattdüütsch.