Moin leev Lüüd,
Utgaav 64. Dat sünd nu all mehr as 5 Johr mit Vertellen, Snacks un Nieges ut de Plattdüütschfamilie.
Boren wurr uns Rundbreef, as wi uns bi de Coronatied nich mehr trepen könen. Dat is nu all lang her, aver uns Rundbreef is nich doot bleven, he hett wussen! Middewiel hebben wi elkeen Maand över 70 „Abonnenten“, un ji künnt den Rundbreef op de Homepage vun uns Börgervereen lesen. Dor gifft dat denn ok Froogen vun Interessenten: Wat maakt ji dor denn egentlich? Snackt ji blot or leest Geschichten? Schrievt ji ok egen Vertellen? Makt ji ok mal en Utfloog or geiht ji gemeensam in een Utstellung or Theoter? Jo, dat hebben wi allens al mookt un dat wüllt wi ok noch maal moken.
Plattdüütsch is lebennig. Dor gifft dat bannig veel to beleven – un dat nich blot för öllere Lüüd, sünnern ok för de jungen Lüüd. Kiekt mal in’t Internet or höört in’n Radio, t.B. NDR 90,3 – awer ok hier in uns Rundbreef. Dor gifft dat denn ok Henwieser op besünnere Veranstaltungen. Un besünners wichtig: dat Drepen bi uns Krink, jümmers an`n tweeten Middeweek in’n Maand. Af Oktober Klock söss.
Elkeen is hartlich willkamen – ok wenn du keen Plattdüütsch snackst. Hauptsaak is de Spaaß un de Freid an de Sprook!
Henwiesen un Winks:
Plattdeutsche Buchmesse 2025
Lichtwarksaal, Neanderstraße 22, 20459 Hamburg
Ok wi wullt wedder am Sonnabend, 08.11., 12-17 Uhr in Lichtwarksaal dorbi sien und uns gemeensam de Bökermess ankieken. Dat is jümmers bannig intressant. Un dat gifft nich blot Bökers to bekieken, sünnern ok noch Lesungen vun de Schriverslüüd or annere Saken, as Postkoorten, Anhängers, Plaketten un vör allen gemeensame Klöönsnacks mit annere nette Lüüd.
Hier geit dat to dat Programm vun de Bökermesse 2025;
https://www.carltoepferstiftung.de/veranstaltungen/plattdeutsche-buchmesse-2025/
Verkloorschiller
Un wieder geihts!
Dat weer an den 16. Juli 2024 – also vör knapp een Johr. Bi 14 Straten mit plattdüütschen Naams in Eidelstedt un Stellingen verkloort nu lütte Tosatzschiller de plattdüütschen Naams op Hoochdüütsch. Een poor Straten sünd aver noch över bleven. Un för düsse Straten schall dat düsse lütten „Verkloorschiller“ nu ok geven.
De Politiker un dat Bezirksamt hebben all „jo“ seggt – man dor fehlt blot noch dat Geld. Aver dat warrt sekerlich ok noch komen. Wi blifft an’n Ball
Das Passwort bitte. Sünst köönt Ji de Geschicht nich lesen.
Die Fahrausweise bitte – dat weer in mien Kinnertiet. Das Kennwort bitte – dat is de hüütige Tiet. So bilütten geiht mi dat op’n Senkel.Wir harrn in unsen Urlaub, obends an’n Kamin, scheune Kissen to’n kuscheln. De harrn vun binnen so’n Ort Licht. Wi kunnen keen Henwies to de Firma finnen. Ober dat Hotel geev uns de Adress.
Ik, ran an den Computer un bi de Firma no den Artikel froogt. Antwort: Twee Sieden mit Henwies un Tüdelüt un de Artikelnummer. De Nummer blinkt un as ik de anklick keem de Text: Wir benötigen Ihr Kennwort, Anschrift, Telefonnummer. Ik söch de Kissen nu annerswo.Wo stüert wi eegentlich op to? Orrer beter seggt: Wo geiht dat hen?
Wi goht nich mehr in de Lodens, de Paketboten suust dörch de Gegend un Nüms is to Huus. Un de Poppiertünnen löppt över. Un wenn du würklich mol enen Minschen an’t Telefon hest un grod dien Anliegen vördregen wullt, kümmt de Froog no dat Kennwort. Eegentlich bruukt de Minsch Licht, Luft und Sonne. Ober nee: Ene APP un dat Kennwort, sünst büst du Luft. En groten, bekannten Loden will ok noch de Email Adress. Ik find dat gräsig. Un veele, veele Annere ok. Ober – se mookt dat mit. Tja, was sollen wir denn machen? Eenfach nix. Hier in Neendörp to’n Bispill kümmt mit dat Wekenblatt ok de Werbung. Un dat warrt jeedeen Week mehr Marks Müüs? De Lüüd wüllt dat swatt op witt un mit den Zettel rin den Loden. Af un an gifft dat lütte Rabattmarken twüschen 5 und 10 %. De kümmt op den Artikel an de Kass, gescannt, un fardig. Veele Lüüd meckert jo ok över de Lüüd de noch mit Bargeld betohlt ! Un wat is mit de Handy APP? Dat Handy warrt erst an de Kass ut Jack orrer Büx rutfummelt. Denn stimmt dat Kennwort nich – nochmol –. De Deern an de Kass warrt nervös, de Lüüd achtern verdreiht de Ogen. Wat is dorgegen de Ool Fro mit € 24,97? Oma hett de Knieptasch al in Hand „Nehmen Sie raus, was Sie brauchen“ seggt Oma. Zack erledigt. De APP bruukt se nich. Se köfft dat wat se bruukt un nich dat, wat de APP so an Vörsläg hett. De Hoffnung starvt toletzt.
So, un hier dat Passwort, dormit Se de Geschicht lesen köönt: XXXXXX
Silke Frakstein
De Schrieversfru Silke Frakstein seggt vun sik sülven, dat se en echt Hamburger Deern is. Her Wutteln liggt op de Reeperbohn. To Welt komen is se in de Finkenau. Hüüt leevt se in de Naverschop vun uns Eidelstedter Krink, in Neendörp. Her lütt Vertellens köönt ji ok in veele Bläder finnen. Düsse lütt Geschicht hett se uns as „Noverin“ för uns Rundbreef tostüüert.
Un nu noch en beten wat för de Ohren:
Kolumne: „Snoozen“
Snoozen is so’n Dings, dor hett Werner Momsen gor nix för över – all vör allem nich, wenn de Partner fröhlich snoozt un he dorwegen nich wiederslapen kann.
von Werner Momsen -Detlef Wutschnik
NDR 90,3 Podcast
Klock söss!
Wi hebbt doröver snackt, dat wi uns in Tokunft all üm Klock söss drepen wüllt. Ik hebb mi mit uns „Vermieter“ Uwe Loose, de „Baas“ vun de Seniorentreff, ünnerholen un wi dreept uns nu Klock söss.
Toeerst an
Middeweken, 08.Oktober, Klock söss!!
Bild selbst
De Plattsnacker dreept sik wedder an’n Middeweeken, 10. September, ditmal noch Klock söven, in dat Huus vun de Elisabeth Kark, Eidelstedter Dorfstraße
To’n Enn noch´n lütten Sprook:
Bild: INSTITUT FÜR NIEDERDEUTSCHE SPRACHE