Utgaav 78

1. November 2026 von Klaus-Peter Schulze

Moin leev Lüüd,

nu hebbt wi all veerteihn Daag Wintertiet – dat heet: De Avenden warrt länger, un wi köönt dat uns kommodig maken. Dor passt dat den ok, wedder mal in een fien Book to smökern.

Anregungen dor to gifft dat noog bi uns Besöken vun de Bökermess in November un bi de Plattdüütsche Bibliotheek in Januar. De Tieden finnt ji in düssen Rundbreef.

Un noch wat Besünners gifft dat dütmal in düssen Rundbreef to lesen: nee Tüügnissen un Ünnersööksergeevnissen in den Kriminalfall „Matten Haas“. Leest mal de twee nee Berichten in uns „Schriefwarkstedt“. Dorna is de Fall nu endlich kloor – or tominnst so kloor, as en Kriminalfall nu mal sien kunn. De Utforschen sünd nu aver een för all Maal afsloten un nu hebbt de Richters dat Seggen.

Veel Spaaß

Hier gifft dat wat to les´n un op de Ohr´n

Köönt ji jo noch besinnen? Bi unsen letzten Drepen harrn wi de Text vun dat Leed vun Hein Köllisch „In de Brommelbeeren“ leest. De Melodie is vun dat Kinnerleed „Es wollt ein Mädchen früh aufstehen“ . Orginal ole Schallplattenopnahmen vun Hein Köllisch hebb ik nich funnen, blot de vun em sungen Text. De Textbläder un en Barg annere Erinnerungen över dat Leven vun Hein Köllisch, dat künnt wi gemeensam bi uns Besöök vun de Plattdüütsch Bökeree in dat Hein Köllisch Zimmer (Link öffnen Strg und Klick) ankieken. Un do wullt wi denn ok in Januar gemeensam hengahn. De Termin harr ik all kloormaakt: 21. Januar,

Drepen deit wi uns Klock een bi de U-Bahn Haltestell Hagenbeck. Vun dor föhrt wi gemeensam mit de U-Bahn bet St. Pauli. Un denn is dat nich mehr so wiet, teihn Minuten to Foot.

Afsluutbericht 27/1867 Doodssaak Matten Haas

Ik Heff ja schon seggt, dat uns Kriminalfall „Matten Haas“ na de letzt Tüügnissen un Ünnersööksergeevnissen kloor un dormit afsloten is.

De beden Bericht: Zeugenaussage vun de Muus un de Spurensicherung dörch de Polizeihund hebbt eendüdig kloor maakt, de Voss weer de Alleendäder. Nu hebbt de Richters dat Seggen Leest mal de beiden Dalschriften:

Lütt Matten… Mordermittlung –

Zeugenaussage Maus

As Lütt Matten vermisst ward, schull ik as Kommissar den Fall lösen. Mien Verdacht fallt op Reinicke, wiel he so satt un tofreden in’t Gras liggt.Ik bruuk Tügen, aver weer hett wat sehn?
De Kreih op den Boom swiegt.
Mit eenmaal meld sik unvermodens een Muus. Se harr sik vör Reinicke verkrupen un allens mitkregen. Se vertellt mi, dat Reinicke de Voss bannig Smacht harr. Dor seeg he Lütt Matten op de Wisch danzen. Dat weer een Tofall.

Achtersinnig as de Voss is, fallt Lütt Matten op em rin. Reinicke hett eerst mit Lütt Matten danzt, denn hett he em mit eenmaal doodmaakt un opfreten.

As he em opfreten dee, meld sik de Kreih. Dormit se Reinicke nich verraden dee, geev he ehr een Been.

Dormit is de Fall för mi kloor: Nu kann ik Reinicke fastnehmen un vör dat Deertengericht anklagen.

Berichterstatterin: Helga Ehlert

Bild NDR

..Lütt Matten…. de Haas
een Barg Ermittlung hett dat geben

Mien Chef harr mi bi den Fall mit totrocken. Ik bün dor bekannt för, dat ik meistens en bannig goden Rüker heff, wenn dat üm den Gang vun de Saak geiht.
Am besten, ik stell mi eerst mal vör: Ik heet Bosco von Eisenbergh … mit’n „h“ an’t Enn schreven. All mien Utbiller kunn sik mien Naam nich marken, un dorüm warr ik sietdem bloots noch Hasso nöömt.
Jo, un wenn ji dat noch nich wusst: Ik bün en Polizeihund. Un ik heff mi dorop spezialisiert, Mordfäll in Holt un Flur optoklären.
Dat mit den Haasen Matten weer so’n Fall.
Den Mörder harrn wi gau överführt. Dat weer nich dat Problem. Blots de Fraag weer: Wokeen harr em holpen?
De Krei villicht?
Mien Nääs föhr mi to’n poor Steden an’n Waldrand. Dor harr de Krei in’n Boom seten. Un genau dor över den Weg keem ok de mörderische Voss daher.
Na, denn weer dat doch allens kloor.
De Krei harr den Voss den Haasen sotoseggen op’n Silvertablett serviert. Un de Voss harr sik denn ganz fein bi den Haasen inschmeichelt.
Un as de Krei denn so bannig luut as en Fiedel krächste, hett de Voss tobeten. Bi den Haas!
De Krei hett dorna en Achterbeen as Swieggeld kregen.
Tja, un so hebbt wi denn beide mitnahmen un achter Schloss un Riegel bröcht.

Berichterstatter: Bosco von Eisenbergh (Ronald Jäger)

Stock Foto

De ganze Akt vun düsse schreklich Untat könnt ji noch eenmal in de Rundbreef vun Juli, Utgaav 74, De Akte „Lütt Matten“ , hörn un lesen.

Wi dreept uns bi de Plattdüütsche Bökermess, Sünnavend, 07. November, bi de Lichtwarksaal, Neanderstraße 22, Klock twee
De Plattsnacker dreept sik wedder an’n 11. November, Klock söss, in dat Huus vun de Elisabeth Kark, Eidelstedter Dorfstraße.
Besöök vun de Plattdüütsche Bökeree, Dünnersdag, 21. Januar 2027, Wi dreept uns U-Bahn Hagenbeck, Klock een

Plattdüütsch in de Kark

Dat is ja nu al ’ne lange Traditschoon in Eidelstedt: Tweemal in’n Johr gifft dat in de Elisabeth-Kark ’n plattdüütschen Gottsdeenst. Intwüschen is dat ok al Traditschoon worrn, dat de Plattsnackers jeedmal as Lektoren dorbi sünd. So weer dat ok letzt Maal in’n Oktober, un so maakt wi dat weddder.

Bundeskonferenz 2026 vun de Wirtschaftsjunioren Deutschland in Hamborg

Wat warrt di erwarten?

Dat wusst wi ok nich, aver wi weern inlaadt un dorbi froogt worrn, of wi nich mal wat över dat Plattdüütsche in uns hüdige Tied vertellen wulln un wo dat mit de Spraak so is. Dat hebbt wi denn ok maakt. Wi sünd geern hengahn, weer dat doch en gode Gelegenheit, för uns Heimatspraak to warven.

26 jung Lüüd hebbt op uns töövt. Een un en half Stünn hebbt wi mit’nanner snackt un sogoor gemeensam sungen. Dat weer för uns all en lebennig Veranstalten. Se weer för beid Sieden bannig interessant, wobi de Lüüd ok markt hebbt, dat Plattdüütsch nich bloots wat för „öllere Lüüd“ is, sünnern ok bi de „jungen Lüüd“ wedder „in’n Komen is“.

Plattdüütsch leevt!

Hier de offizielle Veranstaltungstext ins Plattdüütsch översetzt Mehr anzeigen