Letzt hebb ik ji jo vun de „Schoolarbeiden“ bi de Plattsnakker vertellt. – Wi wüllt nich bloots tohoop sitten un lütte Geschichten ut Böker lesen; nee, wi wüllt ok mit de Sprook leven un mitenanner snacken. Un dorüm mookt wi nu „Schoolarbeiden“. Fief tofällig funnen Wöör warrt an’n Avend vun uns Drepen opschreven. Ditmal : Muusköddel, Rumpott, Appelkorn, Fohrrad un Goorn. Jedeen hett een wunnerbore Geschicht doröver schreven. Dree dorvun find ji ok in dat nege Heff vun uns Börgervereen. Ji warrt ju wunnern, wat för ünnerscheedlich Vertellens dorbi rutkamen sünd.
Un de nächst Huusopgaven hett dat ok all geven: Wi wüllt een lütt Krimi över de Klassiker vun Klaus Groth , dat Gedicht vun „Matten Haas un de Voss “ schrieven. Dat is een bannig schaurige Saak, domals 1867, över de denn ok dat Narichten Blatt bericht hett. Dor gifft dat Moord, Swinnel, Smacht, een achtertückschen Voss, een truschüllig un tutigen Haas un annere slimme Saken. Kiekt mal dat lütt Video
Lütt Matten Haas´-Video- You Tube
un leest dorto de Polizeibericht in uns Rubrik Ut uns Schrievwarksteed.
Veel Spaß
De Fall „ Matten Haas´
Polizeibericht Nr. 27/1867
Uttog ut de Akten vun de Landjägerei
Dat weer an’n fröhen Morgen, as de Buur Harm Siefken op sien Weg dör den Bruch op en Lichtung in’n Wohld de Liek vun de bekannten Haas Matten funnen hett. He leeg ünner en Ellernbusch, dat Fell noch warm. De Dode wies düütliche Bittwunnen op. Man dat Leven weer al ut em wichen. De Naricht verbreed sik gau över de ganze Gegend. Un as bald den Naam vun den Doden fast stunn, weer ok de Naam vun den Verdächtigen in alle Munn: De Voss. Nu kreeg de Landjäger de Fall op de Disch.
De Ermittlungen:
To’n Anfang schien dat eenfach to wesen. De Voss weer in de Neeg vun den Tatort sehn worrn. Man bald keemen Twiefel op. En poor Deerten vertellten, dat de Voss den Haas nich tofällig drapen harr. Beter noch, he schall em vörher fründlich begäng wesen un em sogor Schuul bi`n Danzen verspraken hebben.
De Unnersökers vermoden dorüm en plaante Doot. Apenkünnig harr de Voss dat Vertroen vun den gootglöwigen Matten Haas wunnen, üm em later lichter doot beten to könen.
Dat Eerste, wat opfull, weer, dat de Voss den Doden kennen harr. Mehr noch: De beiden weern in de letzten Weken mennigmal tosamen sehn worrn. Dat verwunnert vele. Wat harr en Voss mit en Haas to schaffen?
De Kreih, de ehr Nest op en hoge Eek harr, weer de eerste Tüüg. „Ik heff nix sehn“, verkloor se. Aver twee Daag later vertell se op eenmaal, dat se den Voss un Matten tosamen snacken sehn harr. Woför hest du dat denn nich glieks seggt, froog de Unnersökers? Dat maakt stutzig. Noch stutziger wöör de Unnersökers, as bi ´n Dörchsöken vun ehr Nest en achter Been vun’n Haas to’n Vörschien keem. „Funnen“, seggt de Kreih. Mehr kunnst ut ehr nich rutholen.
Un de Voss? – De Voss sülvst weer eerst nich optofinnen. As he sik denn doch wiesen leet, weer he gliekmödig un seker. „Ik heff den Haas kennt“, sä he. „Aver ik heff em nich doot maakt.“ – „Wokeen denn?“ – „Dat weet ik nich.“ – „Wo weerst du an’n Avend vun de Daat?“ – „Ünnerwegens.“ – Dat weer allens.
De Sporen an’n Tatort weren nich kloor. Dat harr in de Nacht regent. Wat noch to sehn weer, kunn op mehr as een Deert passen.
Bild Mathias Frank
Un mit de Tiet keem noch wat anners an’t Licht: En lütt Muus verklaar, se harr strieden hört. Nich blots een Stimm, man twee. Un de een schull nich den Voss tohöört hebben. – Dat broch de ganze Sach dörch’nanner.
Wenn dat stimm, weer villicht noch en Tweet in’t Spill. De Uhl, de as besonnen un klauk gellt, meen dorüm:
„Ji köönt den Voss för schüllig hollen. Ji köönt em ok för unschüllig hollen. Man bewiesen is bet nu gor nix.“
So steiht de Fall bet hüüt. Nu bitt de Polizei de Lüüd üm Hölp un Antwoorden ob Fragen as
Hett de Voss den Moord lang vörher plant?
Hett he den truherzigen Matten Haas achtertücks in de Fall lockt?
Is de Kreih blots en Tüüg or Deel vun de Saken?
Un worüm leeg een vun de achteren Been vun’n Haas jüst in ehr Nest?
De Akten sünd noch nich slaten un de Polizei bitt uns üm Hölp. Wenn wi wat weten deit, schall´n wi een Bericht an de Polizei schreven. Un wenn ji ok en Verdacht or Hinweis hebbt, schrievt dat op; schickt uns dat as Mail or mit de Post. Noch beter weer, wenn ji dat dat bi uns Krimiavendbi uns Plattdüütsch Drepen in Septembersülvst vertellt. Dat ward sekerlich spannend.
Polizei Inspektor i.R. Klaus-Peter Schulze
Tieden:
D e Plattsnacker dreept sik wedder an’n 08. Juli, Klock söss, in dat Huus vun de Elisabeth Kark, Eidelstedter Dorfstraße. Besöök op Uwe´s „Höhnerfarm“. De Höhnewr töövt an 15. Juli, Klock twee, in de Fangdiekstraße /Ecke Elbgaustraße bi dat Karkengelände op uns.
12. August, Klock söss, in de Elisabeth Kark, Eidelstedter Dorfstraße: Fru Dr. Ingrid Schröder vertellt uns wat över de Geschicht un dat Bedüden vun de plattdüütsche Spraak Wenn ji mehr weten wullt, klickt mal op düssen Link: Fru Dr. Ingrid Schröder.
Krimiavend – De Fall „Matten Haas“- 09. September, Klock söss, in dat Huus vun de Elisabeth Kark, Eidelstedter Dorfstraße.
Kiekt mal!
Dat Plakat hebb ik ok bi mi an de Bus-Haltestell funnen.
Lees för op Platt
Plattdeutsch ist cool und ein Stück norddeutsche Heimat. Und es lebt von Menschen, die es sprechen, lesen und hören. Unsere Ehrenamtsinitiative bringt daher plattdeutsche Vorleser:innen und Senioreneinrichtungen in Hamburg zusammen. Mach mit!
