Moin leev Lüüd,
Fix wat los — dat is dat Motto vun uns lütten Plattdüütsch Krink. Wi wüllt nich blots tohoop sitten un lütte Geschichten lesen; nee, wi wüllt ok mit de Sprook leven un richtig mit eenanner snacken. Un genau so weer dat bi’n Besöök op Uwes „Höhnerfarm“: De Höhner hebbt zwar keen Platt snackt, aver all de annern Lüüd hebbt fröhlich mitenanner un ünnerenanner Plattdüütsch snackt. Un wat dat dor all to sehn´n un hör´n gaav, dat findt ji bi dat Kapitel: „Ut uns Plattdüütschkrink“
Un dor gifft ok noch wat anners to vertellen: Nu gifft dat bi de Plattsnakker „Schoolarbeiden“. Fief tofällig funnen Wöör warrt an’n Avend vun uns Drepen opschreven, un bi dat nächste Drepen hett denn jeden en wunnerbore Geschicht doröver schreven. Du warrst di wunnern, wat för ünnerscheedlich Geschichten dorbi rutkamen. De fief Wöör för den neegsten Avend findt ji bi dat Kapitel: „Ut uns Plattdüütschkrink“.
Dat is aver noch nich all´s. – In August, dor hebbt wi uns Besöök inladen: Fru Dr. Ingrid Schröder vun de Uni Hamborg. Fru Schröder vertellt uns denn wat över de Geschicht un dat Bedüden vun uns plattdüütsche Sprook. Dat warrt seker een intressanter Avend.
Also fix wat los bi de Plattsnacker! Un wenn ji Lust hebbt, mit uns platt to snacken: Hartlich willkamen. Wi freit uns.
Ut uns Plattdüütschkrink
Huusopgaven
Ik heff ja all vertellt, bi de Plattsnakkers gifft dat nu „Huusopgaven“- Fief tofällig funnen Wöör warrt an’n Avend vun uns Drepen opschreven, un bi dat nächst Drepen kunn denn jedeen en egen Geschicht doröver schreven un de uns all vörlesen. Glöövt mi man, dat mokt Spooß un is bannig kommodig. Un nu de Wöör för de nächst Geschicht:
De sünd: Muusköddel, Appelkorn, Fohrrad, Goorn un Rumpott. Noch is Tied — schriev dien Geschicht un vertell de uns bi dat nächst Drepen, or schriev mi een Mail mit dien Geschicht. Glöövt mi man: Dat maakt bannig Spooß un geiht heel kommodig. Also: Ran an de Fedder – un veel Vergnögen bi’t Dichten! Wi sünd al bannig neeschierig, wat dorbi rutkummt.
Uwe sien Höhnerfarm
Uwe sien Hobby sünd de Höhner. Doröver hett he uns al bannig veel vertellt. Un as fröheren Schoolmeester hett he dor noch besünners sien Freud an, Stadtkinner un grote Lüüd to wiesen, dat Höhner nich bloots Eier leggen, sünnern ok flegen köönt. Sünd jo letztens Vagels!
So sünd wi neeschierig worrn un hebbt Uwe un siene fedderten Mitarbeiders op ehr „Farm“ besöcht. Dat weer nich bloots bannig lustig, man ok richtig intressant. Wi hebbt dor en ganzen Barg över dat Höhnerleven lehrt.
Un Uwe hett uns dat Leven in’n Höhnerstall so lebennig un düütlich verkloort, dat för uns glieks fast stunn: Dor mööt wi unbedingt noch mal wedder hen!
Den Termin finnt ji in’n Kalenner. Un de Höhner? De töövt al op jo! Hebbt se doch för uns Foto-Reporterin Heike al gediegen Modell speelt un sik dorbi bannig wat in Positur smeten.
Kiekt ok geern mol in dat lütte Video rin – denn köönt ji de gefiederten Stars glieks sülvst beleven! 🐔🎬
De Buddeltiet beginnt
Klaus-Peter Schulze
Mien Fro un ik wahn ja in de Grootstadt, in Hamboorg. Un wenn du dor dat Woort“buddeln“ höörst, denkt all jümmers glieks an Baggers, Boarbeiders mit geel Westen,Ümfoohrten för de Autos un nervös Footgängers. Aver nich bi uns. Wi wahnt buten de Stadt in „Groonen“ in´n lütt Siedlung mit staatsche Siedlungshüüs un püük fein propper Vörgoorns. Dat is man ook dat Uthängschild vun de Huusbesitter un Vörwiesstück för de scharp Blicken vun de Navers. In‘ Winter kannst di ja verpusten. Aver af März warrt all de Hüüsbesitters jibbelig. Heet dat doch al in dat Kinnerleed: Im Märzen der Bauer die Rösslein anspannt. Rösslein gifft dat ja nu nich mehr, aver de Bumarkt üm de Eck. Un „anspannen“ kannst bloot noch dat Auto, üm Blomen,Dünger un villicht ok noch en lütt Wicht fördat Blomenbeet to köpen. Gifft dat allens bi`n Bumarkt. Bruukst bloot noch inplanten un de´n Dwarg mang de Blomen stellen. De Saak mutt ja wat hermoken; dröffst di jo nich lumpen laten. Un nu, kann de Buddeltiet denn ook all loosgahn. Mehr anzeigen
- De Plattsnakker dreept sik wedder an’n 10. Juni, Klock söss, in de Elisabeth Kark, Eidelstedter Dorfstraße.
- Besöök op Uwe´s „Höhnerfarm“. De Höhner töövt an 15. Juli, Klock twee, in de Fangdiekstraße /Ecke Elbgaustraße bi dat Karkengelände op uns.
- 12. August, Klock söss, in de Elisabeth Kark, Eidelstedter Dorfstraße: Fru Dr. Ingrid Schröder vertellt uns wat över de Geschicht un dat Bedüden vun de plattdüütsche Spraak
