Moin,
so wurr ik annerletzt begrött. Nix Besünners, aver in’n Krankenhuus? Dat beleevst nich jeden Dag.
Nu aver de Reeg nah:
Dat weer nich besünners slimm, blot een korte Ünnersöken. Twee Döög schall ik blieven. Seker nich schöön. Een lütt Grummeln in’n Magen höört bi’n Woort „Krankenhuus“ aver doch dorbi to. Aver mi hett dat liekers gefallen! – Schon an 1. Daag warr ik vun een jung Krankenswester mit’n fründlichen „Moin“ begrööt; un denn: „Nu man tau! Los geihts!“ – un dat all mit een fründliche Sülfstverstand op Plattdüütsch. Ik wurr total verwunnert. Heet et nich mennigmal, „Plattdüütsch“, vergitt dat. Dat is wat för ole Lüüd. Dat is wat för’t Museum. Miene Krankenswester kaam aver nich ut’t Museum, sünnern ut Finkwarder. „Ik bün een plattdüütsche Deern un mi maakt Plattdüütsch bannig veel Spooß. Bi uns to Huus ward ünnerenanner Plattdüütsch snackt – Mama, Papa, Oma, Opa un ok wi Kinner.“
Seker en Utnahm, aver so’n besünners Beleefnis drievt an, uns Sprook ok wieder to bruken un maakt Moot för de Tokumst. Dorto passt ok de Vördrag vun Frau Dr. Schröder. Leest mal de Bericht över ehr´n Besöök bi uns Krink „Plattdüütsch – wo kümmt de Spraak her?“
Veel Vergnögen
Ut uns Krink:
Plattdüütsch – wo kümmt de Spraak her?
An’n 12. August harrn wi in unsen Kreis
Fro Professorin Dr. Ingrid Schröder vun de Universität Hamborg to Gast.
In een bannig schönen un opklärenden Videovördrag hett se uns vertellt, wo dat Plattdüütsch entstanden is. Obwohl dat Plattdüütsch in de Tiet vun de Hanse, üm 1200, bit hen to üm 1600, sogar to een wichtige Schriftspraak worrn is, hett dat mit den Ünnergank vun de Hanse ümmer mehr an Bedüden verloren. Af 1600 sünd ümmer mehr Städer to dat Hochdüütsche övergahn. Mehr anzeigen
Ut uns Schrievwarksteed:
Kennt ji de Telefonnummer 080 230 100? Nee, mookt nix. Ik harr se fröher ok nich wusst. Aver nu kann ik se di in- un utwenig opseggen.
Aver nu de Reih na:
Hüt bruckst de överall Internet. Büst jo keen Minsch mehr, wenn du nich in WWW weltwidnet surfen deist. Nu Internet heff wi jo all lang, aver dat is oold un duert un duert un duert. Also weg mit dat ole Kupferkabel, hin to Glasfaser.
In’n Telefonladen hebbt se mi denn ok een besünners günstig Anbott maakt. Weern jüst “Aktionswochen”. Ik hebb denn ok bestellt. Wenn du nu aver denkst, du kreegst een richtig Koopvertrag, so ut Papeer, mit Ünnerschrift un Stempel un so, denn hest di aver bannig sneden. Nee, giffst nu all per Internet un Mail. Hett aver prima klappt. De Mail-Post weer foorts dor un de Termin för de negen Ansluß bestätigt. Hett ok funkschoneert. Un wat segg ik di, de Lüüd vun de Post, de Arbeit sogor in de Nacht. De Mail weer morgens Klock half veer komen. Dat is doch wat! Mehr anzeigen
[Festival op Platt in Elmshorn – Kultur buten un ümsunst,
dat weer dat Motto vun de 8. Elmshorner Platt-Festival. Mehr as 2000 Lüüd weern komen, ok een poor Plattsnakker ut Eidelstedt. Dat weer bannig hitt in de Sünn, aver et weer genug Schatten dor, üm een schöön Namiddaag to beleven. Kiekt mol op dat lütte Video
W i dreept uns wedder an
Middeweek, 09. September, Klock söss,
in dat Gemeendehuus vun de Elisabeth Kark, Eidelstedter Dorfstraße
Hier gifft noch wat op de Ohrn!
Dat sünd nu de Gebröder Wolf mit ehr Leed „Snuten un Poten“, ok wenn dat in den Vorspann vun dem Lied „Jung mit de Tüddelband“ heet. Dat gifft dat denn een annermal.
An´n Enn noch wat to´n smuustern:
Moin Moin
Papa geiht mit sien Dochter spazeern, as een jung Mann tomööt kümmt. He seggt fründlich „Moin, moin“.
„Segg mal, kennst du de?“
„Jo, meent de Deern, „dat is doch de Mann vun de Umweltschutz. De kummt bloot, wenn du nich to Huus büst, un denn fraagt he Mama jümmers:
„Is de Luft rein?“
Bild Stock