Moin leev Fründ,
nu is all Frühjohrstied un Oostern steiht vör de Döör. Un da ward dat wedder lebennig. Nich bloot buten bi de Deerten un in dat Gröön, nee ook bi uns in uns lütt Kring.
As nächst Termin, 20. April, hebbt wi uns gemeensam Lesen in de Bökerhall vun Eidelstedt. Maakt man bannig veel Reklaam un seggt ook all, de Freud un Vergnögen an uns Spraak hebbt, Bescheed. Stöhl gifft dat noog.
Un an´n 15. Mai wüllen wi uns denn tosamen de Schaarhörn ankieken. Dor gifft dat nich blot dat Schipp antokieken, sünnern bi Kaffee un Koken ook noch lütte plattdüütsche Vertellens. Bringt geern Frünnen mit. Dat is en selten Gelegenheit, dat Schipp in dissen lütten Rahmen to besöken. Aver nich vergeten, tovör Bescheed to seggen. De Plätz sünd man knapp.
De nächst Termin steiht noch nich fast, aver de Idee gifft dat al, en gemeensam Besöök vun de nedderdüütsch Bibliotheek. Fro Dr. Möller, de Böverste un gode Bekannte vun uns Kring, schall uns dat all verkloren. Dat is bestimmt nich langwielig un wokeen kennt al dat ne´e “Hein Köllisch” Zimmer. Wi warrn uns dat ankieken.
Ut de Plattdüütschfamilje:
Letzt Tied weer ik bi en Plattdüütsch Lesen. De Schrieversmann hett sien Book mit de Bemarken vörstellt, ditmal nich bloot Geschichten ut dat domalig Dörpleven, sünnern ook aktuelle Beleefnissen to vertellen. Vertellens ut uns hüdige Tiet mit de Begreep, mit de wi jedeen Dag leven. Un dat allens op Plattdüütsch – Sien Ansicht nah en Bewies, dat Plattdüütsch keen doot Spraak is. Dat aktuelle Bewiesen dorto leefert ook dat Projekt “Pepper” vun de Universität Lübeck. Pepper, en op son Oort as een Minsch utsehn Roboter, lehrt, snackt un kommunizeert mit di op plattdüütsch. Keen Speeltüüch, sünnern de eernsthaftig Versöök, uns Spraak in dat hüdige Leven mit “modern” Wöör or Snacks to bruken. Kiekt mal ünner
https://www.ndr.de/kultur/norddeutsche_sprache/plattdeutsch/Pepper-de-Roboter-lehrt-Plattdueuetsch,pepperplatt144.html
Dat is bannig intressant.
Ut uns Schrievwarksteed:
Tieden:
-
De Plattsnacker dreept sik wedder an’n 10. April, Klock söven, in dat Gemeendehuus vun de Elisabeth Kark, Eidelstedter Dorfstraße
-
4 . Hamborger Platdüütschdag, 20. April, Klock dree bit Klock fief in´n Bökerhall Eidelstedt, Kulturzentrum Steeedt
-
08. April, de letzt Mööglichkeit för de Beseuk op de MS Schaarhörn antomellen. Kösten deit dat för jedeen de mitfohren will 09.00€. Wi dreept uns S-Bohn Elbgaustraße Klock 13.30 Uhr. De Fohrkoort mutt jedeen sülvst betohlen.
Seggt mi per Mail or ünner 571 93 466 (AB) Bescheed of ji or joon Frünn dorbi sien wullt.
To´n Enn noch´n lütt Snack:
Man nich so bang,
sä de Hahn to de Regenwoorm,
dor freet he em op.