Rundbreef 49

Moin leev Lüüd,

ook wenn Pingsten man nu al vörbi is, heff ik doch noch lütt Vertellsels vun tradischonelle Pingstbrüük bistüert. Un natürlich mutt ook de klass’sche Pingsttour vun Hein Köllisch dorbi sien. De Geschicht vun Hein Köllisch un sien Leed köönt ji bi dat Stremel “Henwiesen un Winks” lesen un hören.  Aver nu toeerst dat Pingsttour Leed ut de Lünborger Heid, de Pingstvoss.:

Dat Pingstvoss-Leed

“Pingstvoss hett sin Been afbroken,
mutt damit noan Doktor gahn,
Doktor makt dat nich umsünst,
möt wie us wat sammeln:
Eier in’n haut,
dat let gaut,
Geld inne Mütz,
dat let hübsch.
Use Deel is holl un boll,
dusend Daler har jü woll,
een davon in unse Kiep,
jü ward selig, wi ward riek.“

So weer in vele lütte Dörper in de Lünborger Heid dat Pingstvoss-Singen en ole Traditschoon. Elk Jahr an’ Pingstsünndag trucken de Kinner mit en Bollerwagen, de an’n Dag vörher mit Maiboomtwiegen överspannt un mit Blomen smöökt wöör, vun Huus to Huus un sungen dat plattdüütsch Pingstvoss-Leed.

As Dank geev dat Bontjes, af un to ok en Stück Platenkoken, en Ei or Groschen. De weern natürlich an’ beleevst. In’ Bollerwagen seet en Kind as ‘lädierter” Pingstvoss, dat ook den Korv för all de lütt Geschenk hollen un op se oppasst hett, de an’ Enn mang jedeen gerecht opdeelt wurrn.

Dat weer de een Siet. Aver to Pingsten fangt ja ook dat Fröhjohr an un dormit de Tied för den Fröhjohrsputz. Dorto hett Willem Resch nu sien besünner Ansichten un ook Beleevnisse. Hör mal bi de Höörböker.

Veel Vergnögen

Ut de Plattdüütschfamilje:

Op de letzt Versammeln vun den Regionalutschuss Stellligen/Eidelstedt hebbt de Politikers wedder över uns Projekt “Verkloorschiller” för de plattdüütsch Straatennaams snackt. 3500€ hebbt se uns tostahn. Dormit sünd wi mit uns Projekt en grooten Schritt vöran komen; vör all nu mit de Spendentoseggen vun de Töpfer Stiftung de Kösten sekert sünd.

Uns Wunsch is, dat de eerst Schiller noch vör de Sommerpoous stohn deit. Villicht ward dat ja noch wat.

Henwiesen un Winks:

Pingsten un “De Pingsttour” vun de plattdüütschen Schrieversmann Hein Köllisch, dat höört in Hamborg tosomen un is nu all Tradischon.

          Speelbudenplatz     

Hein Köllisch  geev an sien Stammdisch in en Eckweertschop op de Bartelsstraat faken eenfache, plattdüütsche Leder un schreeg Couplets to’n Besten. Dorbi full he een Dag den Kröger vun en Lustlokal op St. Pauli op, de em as plattdüütsch Spijoekenmaker ünner Verdrag nehm. Sien eerst Engagement kreeg he den eersten Mai 1892 in den „In’ söventen Himmel“ an’ Speelbudenplatz, wo he jedeen Maand för 300 Mark optreden de. To düsse Tiet kreeg Schuerlüüd 3 Mark pro Dag för 15 Stünn Arbeit.

Twee Jahr nah sien eerst Engagement 1894 hett Köllisch denn sien egen Theater an’n Speelbudenplatz apen maakt. In „Hein Köllischs Universum“ stunn he jümmers mit Frack un Zylinder sülvst op de Speeldeel. „För mien Moderspraak is mi de best Antog jüst goot noog“ sall Hein Köllisch seggt hebben. De Texte to sien Leeder hett he sülvst schreven un hett se mit populär Wiener Melodien wiest. To sien mehr as 100 Couplets hörrn Leeder as De Orgel kummt, De Reis noch Helgoland un vör alleen De Pingsttour.

För all düsse Geschichten un Erinnerungen gift dat bi de Nedderdüütsch Bibliothek een besünner Hein Köllisch Room. Dat wullt wi uns tosomen mal bekieken. Den Termin warr ik rechttiedig anseggen.

Höörböker

 Willem Resch nu sien besünner Ansichten un Beleevnisse to Pingsten

Tieden:

De Plattsnakker dreept sik wedder an’n , 12. Juni Klock söven, in dat Huus vun de Elisabeth Kark, Eidelstedter Dorfstraße

To´n Enn noch´n lütten Snack:

Wannehr schall ik arbeiden? sä de Fuule.

In´t Fröhjohr is to veel Water,

in´n Harvst to veel Dreck,

in´n Sommer is dat to hitt

un in´n Winter to koolt.

Kommentare sind geschlossen.