![](https://eidelstedter-buergerverein.de/wp-content/uploads/2023/07/Rundbrief-Logo-1024x376.png)
![](https://eidelstedter-buergerverein.de/wp-content/uploads/2023/08/Datumszeile-BrodyJoiD-90-1024x212.png)
Moin leev Lüüd,
de Sommertiet is ja meist vörbi, aver noch nich ganz un dat kann ja ok noch en schöön Harvst geven. Villicht hett ja denn de een oder anner Lust, noch eenmal mit sien Familie en Utfloot an’ See to maken.
Un wenn de Sünn nich schienen will, gifft dat doch ok ahn Sand un Meer veel to beleven. Hier en poor Vörslääg, de ik an de Oostsee in de Daagblatt leest hebbt as de Sünn afsluut nich schien wull un dat Wedder för de Strand to koolt weest warr. Man de Kinner schöölt denn ok ahn Sand un See woll ehrn Spaaß hebben. Un dor gifft dat bannig veel to beleven.
Un de Oostsee un Sleswig-Holsteen sünd ja ok de Heimat vun uns Plattdüütschen Sprook. All op de Henfohrt fallen de faken tweesprakigen Oortsschillers op. Hier ward plattdüütsch snackt.
![](https://eidelstedter-buergerverein.de/wp-content/uploads/2023/08/snacken-wie-ein-hanseat-894x1024.jpg)
Plattdüütsch is nich utstorben. Plattdüütsch leevt! Föhrst du över de Dörper un snackst de Lüüd op Plattdüütsch an, mutt du nich lang töven un de Lüüd snackt denn ok platt mit di. Dat mookt Freid un dat lohnt sik, op Entdeckungstour to gahn.
Besünners intressant, dat Torhausmuseum in Neestadt – https://www.zeittor-neustadt.de. Hier gifft dat nich nu ene vun Heinrich Evers gesprochen plattdüütsche Audiotour, sünnern ok vele Mit- mach-Aktivitäten för de Kinner. Un in de Haven vun Neestadt hebbt faken histoorsch Scheep de´n Anker smeten un könen denn bewunnert warrn.
![](https://eidelstedter-buergerverein.de/wp-content/uploads/2023/08/block.jpg)
Natürlich höört ok Lübeck as Hööftstadt vun de Hanse to en Utfloog an de Oostsee dorto. In de Ooltstadt kann man sück dat Leven in de domalig Kooplüüdstadt ok hüüt noch so richtig vörstellen.
Un de Weltsprook vun de Kooplüüd weer uns Platt, dat „Buiseness Englisch“ vun de Hansetiet. Ahn uns Plattdüütsch harr sik de Kooplüüd domals nich weltwiet miteenanner verstahn könen un de Hanse weer nich so bedüüdend wurrn.
![](https://eidelstedter-buergerverein.de/wp-content/uploads/2023/08/altstadt-1024x527.jpg)
In dat Hanse-Museum – https://www.hansemuseum.eu – kann man denn de Saak „so richtig op den Grund“ gahn. Dat is ok för de Lütten opregend. Aver ok ahn dat Museum is Lübeck mit Holstentor, den veel Karken, Marzipanmuseum or dat Marzipanabitur allemal een Dagsutflöög weert.
12 toll Utfloogstipps finnt ji denn noch ünner www.12-tolle-utflugstipps.de.
![](https://eidelstedter-buergerverein.de/wp-content/uploads/2023/08/tier-2-1024x599.jpg)
Ik heff dat all´s all mookt. Ok in dissen Sommer weer ik wedder an’n Oostsee. Dat weer allerbest.
Veel Vergnögen un
veel Freid, Sünn un Spooß an de See
![](https://eidelstedter-buergerverein.de/wp-content/uploads/2023/04/Klaus-Peter.jpg)
Ut de Plattdüütschfamilje:
Aver ok för uns Plattsnacker gifft dat na de Ferientiet wedder wat för den “Terminkalenner”.Kiekt mal op de Side vun de Töpfer Stiftung. Dor is bannig veel los. https://www.carltoepferstiftung.de/veranstaltungen/
Bökers un Snacken – de plattdüütsche Bökermess
Meist 40 Verlage un Institutschonen sünd wedder an Sünnavend, 11. November un Sünndag, 12. November in`n Lichtwarksaal in de Neanderstroot vertreden. Dorbi ok wedder veel vun de Schrieverslüüd, de ut her Bökers vörlesen deit un de plattdüütsch Gottsdeenst in de Michel Kark.
Jüst so wichtig as de Bökers is dorbi dat Drepen un een lütt Klöönsnack mit Lüüd, de so as wi plattdüütsch snackt. Ok Maten vun uns Krink hebbt letzt Johr vörbikeken.
Dat Programm findt ji op de Homepage vun de Töpferstiftung.
Tieden:
De Plattsnacker dreept sik wedder an’n 13. September, Klock söven, in dat Huus vun de Elisabeth Kark, Eidelstedter Dorfstraße
To´n Enn noch en lütt Snack:
Allens wasst na baven,
blots de Kohsteert nich!,
aver
Wat en will,
dat kann en ok!
-Wenn dat so is, denn kann de Koh
ehren Steert wull ok na boven wassen loten,
se mutt dat bloots wüllen.
Reimer Bull
![](https://eidelstedter-buergerverein.de/wp-content/uploads/2023/08/Kuh-Bull.jpg)
/