Moin leev Lüüd,

Dat Fröhjohr is endlich dor, un dormit kümmt de Freud op dat Oostertiet. Överall blöht de Blomen un in de Natur is dat nee’e Leven waak wurrn. Ok de Plattsnakker hebben sück wat vörnöhmen för de tokamen Tied. Op de Plan steiht u.a. een spannend Verbreekerjagd an´t Fleet in de Hamborger Spiekerstadt un een Besöök vun de „Hühnerfarm“ vun uns Plattsnacker Uwe. Bavento wüllt wi to to de Lesung vun Heinrich Evers in de Lichtwarksaal gahn. Dat ward denn lie­kers ok en intressant Avend. Över de Terminen snackt wi denn tohoop bi uns neegste Dreepen in Mai. Dat gifft also veel to beleven.

Ut uns Plattdüütschfamilje:

Foto EBV

Verkloorschiller

In en eersten Schritt kunnen wi in dat letzt Jahr uns Idee för de „Verkloorschiller“ (hoochdüütsch Verkloren vun den plattdüütschen Straatennaam) eerstmals för Hamborg in Eidelstedt ümsetten. 14 Straaten sünd dat bet nu. Dat gifft aver noch 22 Straten in Eidelstedt. Ok för düsse Straaten wünscht wi uns de „Verkloorschiller“. Doröver hebbt wi all mit de Bezirkspolitikers un dat Bezirksamt snackt. Dat weer doch schöön, wenn uns Idee vun de „Verkloorschiller“ ok bi de övrigen Straaten „klappen“ würr un evtl. ok in de anner Stadtdeelen Namaker finnen deit. Nafraagt hebbt al en poor Lüüd ut anner Stadtdelen. Weer doch goot, wenn dat de Verkloorschillers nich bloot in Eidelstedt geven deit. Heet dat doch: „Plattdüütsch sichtbor moken.

 

2x Bökerflohmarkt

För dat drütt Maal harrn wi uns Bökerschap apen maakt. Dat weer bi  in uns in dat Gemeendezentrum vun de Elisabeth Kark. Elkeen kunn sien Böker ünnerenanner wesseln un sien leevsten Book mit na Huus nehmen. Böker geev dat mehr as noog un so bleev noch en staatscher Barg övrig.

Un dorto weer vörher verbreedt, düsse Överblievels för den Bökerflohmarkt vun de Eidelstedter Bökerhall as „Warv“ för dat „Plattdüütsche“ to spennen un togliek bi en lütten Lesen vun uns egen Geschichten uns Kring bekannt to maken.

Henwiesen un Winks:

Dat Landzentrum för Nedderdüütsch (LzN) in Bremen un dat Waldpädagogikzentrum (WPZ) Ostheide hebbt tosommen en Broschüre mit plattdüütschen Wooldtier­naams verapenlicht. Dorin künnt de Lüüd nakieken, dat to´n Bispeel de „Katzer“ en Eichhörnchen un de „Boom­hacker“ de Specht sünd. Tosamen sünd rund 100 Der­ten „op Platt“ dorin to finnen. Mit de Broschüür wüllen de Makers nah egenen Angaven de Artenkenntnis föddern un de plattdüütsch Woorschatt vun de Waldbesöker wat grötter maken. Dacht weer dat Book för de Büxentasch för Öllern un Kinner, Scholen un anner intresseert Lüüd. De Broschüür dröögt den Titel „Waldtiere op Platt – ut noorddüütschen Wäldern“. Dat ist bi de Waldpädago­gikzetrum Ostheide un bi dat Länderzentrum für Niederdeutsch över dat Internet – Waldtiere op Platt–   to kregen

Nee’es ut Hamborg

Thomas Kammigan

We kriegt nu nee’e Schiethüser in Hamborg. För 20.000 Euro. Dat mutt ja all een Luxus Plastik Toi Toi ween, wenn dat so düer is. Ne, ik heff nich richtig henkeken, 200. 000 Euro schall de kösten. Dor kannst du di all een Luxushuus ut dat Johr 1930 mit Grundstück in MV koopen.

Ja , und wat is dar so nee’es an? Sülvreiniegen“ Un wo geit dat? Mit de Klobrill kennt we dat ja al. Un mit den Footbodden weet we dat ok, dor foort soon lütte Schildkrööt as een Huulbessen dörch den Ruum. Must oppassen, dat he di nich vör de Been fohrt, denn kanns lang henslaan. Un wenn du dor nu so sitten deist, hest dien Keesblatt an de Eer lecht, een Ablag is dor ja nich, kümmt dor so een automatischen Arm rut un grabscht di de Tietschrift weg. Reinheit is dat eerste Gebot. Must oppassen, dat dien Büx nich ok noch weg is. Oppassen must du mit dien Papier, wenn dat to lang in Hand hollen deist, schwupp is dat ok weg. Wenn fartig büst, kümmt dar son Drohn mit een Kloböst un suust in de Kloschöttel, dreiht dar son poormal rum und suust weder af. Un wenn de mal defekt is, suust se di öbern Koop, poliert de Luusglitsch oder dreiht di de Hoorop. Denk door blos mal an de Fronslüüd, de Drohn neit di mit dat Hoordeel af und davon. Un denn gifft dat ok noch W-Lan in dat Schiethus. Dor kannst denn mit dien Quasselkasten, modern heet dat Smartphon, telefoneeren or speelen. Dat hebbt de Lüüd ok, de di op de Straat anrempeln un di anpöbeln doot, dar kannst du doch seen, dat se an tippen sind. Dor sitt nu een in sien Kabine un speelt mit Kuddl un Walter ne lang Tied. He kann ja nich oppholn, denn hett he ja verlom.

Ik stah vör de Döör, kniep de Been tosamen, un kann dar nich rin. Von buten kannst de Döör ja nich open maken. Und so kann he dor so lang speelen as he wull. Allens Nee’e is denn doch nich so dull. Denn is mi soon Klo mit een Klofru doch lever.

De Rechtschrievwies is vun ’n Schriever övernahmen worrn.

 

De Plattsnacker dreept sik eerst wedder an’n

14 Mai

Klock söven, in dat Huus vun de Elisabeth Kark, Eidelstedter Dorfstraße.

Uns Drepen in April fallt ut.

Bild EBV