Moin leev Fründ,
toeerst kemen 5, an’ Enn weern 17 Plattsnakker to uns eersten Bökerflöhmarkt kamen. Elkeen harr sien “Päckchen” mitbröcht un de Bökerutwahl weer teemlik groot. As wi hööpt hebbt, wurr gemeensam stövert, in de Böker blättert un mit de Naver tuuscht. De Asterix op plattdüütsch harr foorts een nege “Leefhebber” un ok dat Book mit de echt Ünnerschrift
vun Rudolf Kinau leeg nich lang op den Bökerdisch. Aver Utwahl geev dat rieklich. Klor, dat man ok mit den Naver klöönt un sück dorbi ok af un to nee kennenlehrt. Wi weern denn nich bloot ünner uns. Opmarksam wurrn dör de Henwiesen op uns Websteed un de Bekanntgaav in dat Anzeigenblatt weern ok enige Gäst kamen, de uns noch nich kennt hebbt.
Dat wurrd aver nich blot in de Böker leest, dat wurrd ok jümmers mehr Platt ünnerenanner sproken. Un welk een villicht noch Twiefel harr, man weer ja noch nich perfekt, verswunnen düsse Bang jümmers mehr. Ik glööv, all harr Spaaß un Freud doran, sück op plattdüütsch to ünnerhollen un achteran to Huus de Böker op plattdüütsch to lesen.
Henwiesen un Winks:
Dit Book heff ik in de Eidelstedter Bökerhall funnen – tweesprokig: Hoochdüütsch un Plattdüütsch. Dat Book kann dor utlehnt warrn, un villicht hett de een oder anner Lust, dorut sien Enkels wat vörtolesen. Dann wunnen de Kinners sück villicht ok nich mehr, as “gediegen” Oma un Opa mennigmal mitenanner snackt. Dat is en wunnerbor Kinnergeschicht.
Ut de Plattdüütschfamilje:
In Juni wullt wi wieder in de Eidelstedter Bökerhall gemeensam platt snacken. “Plattdüütsche Vertellens ut Eidelsteedt or annerswo her”. Leest or schreven vun Lüüd ut Eidelsteedt. Un dorto bruukt wi Geschichten un Vertellens. Wenn ji Lust hebbt un sülvst Geschichten schrievt hebbt un Freid doran hebbt de vörtolesen, seggt mi dat or schriev ´n E-Mail. Dat wurrd bestimmt en fien Namiddag un hett vergangen Jahr veel Freid maakt. Also: Wees nich bang, tru di wat un fang an.
Tieden:
- De Plattsnacker dreept sik wedder an’n 10. Mai, Klock söven, in dat Gemeendehuus vun de Elisabeth Kark, Eidelstedter Dorfstraße
- “Wi snackt platt” – Plattdüütsche Vertellens ut Eidelstedt, Sünnavend, 24. Juni, Klock dree, Bökerhall Eidelstedt, Alte Elbgaustraße 12
To´n Enn noch´n plattdüütsch Limmerick:
In Hamborg versack in de Elv
en Quiddje. He reep noch: “Zu Helf”
Dat weer för de Katt.
De Mann kunn keen Platt!
He sturv staats Klock ölven – “um elf”.