Johresrüchblick 2022
Dat weer en Töven un Töven, aver langsam gung dat denn doch wedder los. Corona harr nich mehr dat Seggen, sünnern wi. Af Februor kunnt wi wedder tohoop sitten un gemeensam snacken.
Siet över 10 Johren draapt wi uns nu all elk tweeten Middeweek in ’n Maand. 10 bet 15 Lüüd sünd wi. Un dor warrt nich bloot snackt, man ok mennigmal luutstark lacht. Un dat kann man af un to ok bet op de Straat hören. Dat geiht teemlich fidel bi uns Versammeln to. Aver nich bloot denn. Ok wenn wi Utflüggt maken, Theaterupföhren ankieken oder ok egen Veranstalten planen. Un dor harrn wi in vergangen Jahr veel nachtoholen.
Glieks in’ April gung dat mit en Plattdüütsch Lesen in de Eidelsteedter Bökerhall los. Plattdüütsch Vertellens ut Eidelsteedt un annerswo her – leest or schreven vun Lüüd ut Eidelsteedt. Dorto Gift dat ok een lütt Video. Klickt man mal düssen Link an. https://eidelstedter-buergerverein.de/wp-content/uploads/2022/05/Plattdueuetschdag-Homepage.mp4
Un dor gifft dat denn ok noch en Video, ditmal vun uns Utfloog –Scheep bekieken- na Schulau to de Scheepbegröötungsanlaag. Ok dorto de richtig Link. https://eidelstedter-buergerverein.de/wp-content/uploads/2022/07/Schulau-Juli-2022-e-mail.mp4
![](https://eidelstedter-buergerverein.de/wp-content/uploads/2023/01/grafik-1024x496.png)
“Platt is bunt” weer dat Motto vun de Plattdüütsch Bökerutstellung in November Maand. De Utstellung gift dat jedeen Johr in Lichtwarksaal, glieks üm de Eck vun de Michel. Veel geev dat to sehn, to hören un ok gemeensam mit anner Plattsnacker to vertellen. De hebbt wi uns gemeensam ankeken un glieks uns “Leesstoff ” för tohuus utsökt.
Man dat weer noch nich all. Kultur weer anseggt!
Twee plattdüütsch Theaterupföhren hebbt wi uns bekeken. Beid vun plattdüütsch Bühn ut de Naverschop – Appen un Rellingen -. Jedeen Theaterstück weer en spoodriek Speelwark.
Un op de Wiehnachtfier vun de Börgervereen, dor hebbt wi sülven Theoater speelt,
Sneewittchen un de söven Dwargen.
![](https://eidelstedter-buergerverein.de/wp-content/uploads/2023/01/Screenshot-2023-01-14-164912.jpg)
Dat Jahr gung to enn mit uns gemeensam Adventsfier. Dütmal mit Gitarrmusik, gemeensam Leedern un natürlich dat all traditschonelle sülvst schreven Wiehnachtsgedicht vun uns Senior Günter. Ok dorto gifft dat en Video mit de richtige Link. https://eidelstedter-buergerverein.de/wp-content/uploads/2023/01/Advent-De-Plattsnakker-2022-1.mp4
Langwiel geev dat nie un ok för dit Jahr is de Plaan al in’ Arbeit – to’n Bispeel en plattdüütsch Filmavend in’ Februar, Rathuusbesöök, Theaterupföhren ankieken un noch mehr. Also fix wat los bi de Plattsnakker. Un wer Lust hett, kunn sik geern ansluten or ok an uns Avenden dorbi wesen.
Hartlich willkamen.
![](https://eidelstedter-buergerverein.de/wp-content/uploads/2023/01/Klaus-Peter.jpg)