Moin leev Lüüd,
Wiehnachten steiht glieks vör de Döör. Dat sünd ja man nu noch twee Daag. Ditmal heff ik darför en besünnere Wiehnachtsutgaav tosomenstellt.
As jedeen Johr, toerst dat Wiehnachtsgedicht. Ok in dat Jahr hett Günter Grell wedder en Wiehnachtsgedicht schreven. Nix is aktueller as dat vun em in de Gedicht schreven:
„Wi brukt nu blos ee beten Moot. Den Moot, ok mool an >Morgen< to denken.“
Lest eenmal sülvst.
To´n Tohören gifft dat ok wat. Dor vertellt uns Reimer Bull bi „We snackt platt“ vun de NDR sien egen Droom vun’n Wiehnachtsmann.
Un as Leesstoff finnt ji de Geschicht Torüch no Hamborg. En beten mit „Ogenplinken“, aver wahrhaftig.
To`n Afsluss gifft dat denn noch twee Rezepten för besünners goot Wiehnachtsleckeree.
Veel Spaß.
De Klocken de lüüd,
Wiehnacht is hüüt.
Dat hept wi fröher in Chor al sungen,
un dat het meerstens ok goot klungen.
Den Chor, den gifft all lang ni mehr,
un ok dat Singen fallt mi schwer.
Dat lot ick nu ok leeber blieben
un begnöög mi mit dat Schrieben.
Ja, wat schall man nu noch meenen?
Dat gift so veel, dor kanns meis weenen.
Ton Bispeel düssen leegen Krieg.
Dor gifft blos Verleerer, keenen Sieg!
Un Inflatschon un hooge Priesen
för Gas, vör Strom un ok för Spiesen.
Un trotzdem geit uns dat noch goot.
Wi brukt nu blos een beten Moot.
Den Moot, ok mool an „Morgen“ to denken,
un de Gedanken op wat Schönes lenken:
Wenn to Wiehnachten de Glocken klingt
un all Lüüd Wiehnachsleeder singt,
wenn alle Menschen fiert op ehre Ort,
Kinner, Öllern un Kerls mit Boort,
wenn Geschenken ünnern Dannboonm leegen,
un all sik hööcht, wenn se wat kreegen,
wenn wi de Sorgen all vergeten,
denn weet wi, dat will Wiehnacht heeten.
Un nu, een schönes Wiehnachtsfest.
Ick wünsch ju all dat Allerbest.
De Klocken de lüüd,
Wiehnacht is hüüt.
Günter Grell
Wiehnacht 2022
Tieden:
De Plattsnacker dreept sik wedder an’n 11. Januar, Klock söven, in dat huus vun de Elisabeth Kark,
Eidelstedter Dorfstraße
.
To´n Enn noch twee Rezepten för besünners fine Wiehnachtsleckeree:
