Utgaav 29 – 30. September 2022
Moin leeve Lüüd,
„To ́n Enn noch ́n lütten Snack“, dormit slutt jümmers uns Rundbreef. Ook dütmal wedder, bloot höört sik dat doch en beten anners an, as wi dat weent sünd. En Spröök vun Fritz Reuter ut sien Book „De Reis nah Konstantinopel“ – Mecklenborger Platt. För uns Ohrn deelwies nich weent, aver doch de tyypsch plattdüütsche Toonfall un dorüm ok för uns to verstohn.
Nedderdüütsch or mehrstendeels ok Plattdüütsch nöömt, is en egen Regionalsprook in Noorddüütschland un in Oosten vun de Nedderlannen. – In Düütschland sünd vundaag de Länner, welk an Water liggt, de Region, in de de mehrsten vun de Plattdüütschen leevt. Minschen, de de Sprook snackt un för männnicheen ok de twete Moderspraak neven dat Hoochdüütsch is. Platt warrt in de hele Sellschop snackt un dat vun bannig ünnerscheedlich Minschen. So wat as 3 – 4 Millionen Noorddüütsche snackt vundaag düsse Sprook. Dorto höört ok de Plattsnacker ut Eidelsteedt. Un dat mookt uns bannig veel Sposs un Freid. Also…
„Snackst du platt? Wees nich bang, tru di wat un fang an!“
Elk een tweten Middeweek in de Maand hest du de Schangs. Kiek mal ünner de Afsnitt „Tieden“. Dor steiht de Tiet, wenn wi uns wedder drepen doon.
Wi deit uns freien, tohoop mit ji to snacken
Ut de Plattdüütschfamilje:
Spazeergang to´n Utforschen vun uns Stadtdeel för Lüüd af 60 plus weer dat Motto vun en gemeensam Padd dör uns Stadtdeel. Anspraken weern all Eidelstedter af 60 Jahr, de tohoop mit anner Lüüd Öörd, Minschen un Weeg kennenlehren un gemeensam hör Freetiet verbringen wüllt. En Statschoon op dissen Spazeergang weer ünner annern de Gemeensaal vun de Elisabeth Kark. Un dor hett dat passt, dat sück gemeensam mit anner Vereenen ok de Börgervereen un wi uns de Spazeergängers vörstellt hebbt. Wi, dat weern dree aktive Plattsnackerinnen ut uns Krink, de an dissen Namiddag hör plattdüütsch Weten vörwiesen kunnen. Dank ok un villicht hett de een or anner Spazeergänger Lust kregen mit uns platt to snacken. Dat Interess weer jedenfalls groot un de torechtmookt Handzeddels worrn all geern annähmt.
Henwiesen un Winks:
“der neue SASS”, https://netz.sass-platt.de/, Standard-Nokiekbook för plattdüütsche Begreep, ehr Översetten un Schrievwies, is nu ok online ween un för all freegeven. Mit en bequeme Söökfunkschoon loot sik nich bloot hoochdüütsch Begreep un ehr „Översetten“ op Plattdüütsch finnen. Ok anners kann na plattdüütsch Begreep un ehr Bedüden in Hoochdüütsch söcht warrn. Neven de Begreep un ehr Översetten sünd ok all Plurals, Konjugatschoon, Deklinatschoons- un Kombinatschoonsformen in dat plattdüütsch Online-Wöörbook opföhrt. En groot Hölpsmiddel för uns all, de de plattdüütsch Spraak geern hebbt un noch mehr lehren wüllt.
Man, dat gifft noch mehr plattdüütsch Nokiekwarken in dat Internet: Wikipedia. Wenn ji de Siet https://de.wikipedia.org/wiki/Wikipedia:Hauptseite oproopt, findt ji op de linke Rand „Annere Spraken“ teemlich in de Mitt • Plattdüütsch. Eenfach anklicken un de Enzyklopädie snackt Plattdüütsch. Veel Spooß.
Tieden:
• De Plattsnacker dreept sik wedder an’n 12. Oktober, Klock söven, in dat huus vun de Elisabeth Kark, Eidelstedter Dorfstraße
• Na twee Johren ahn Bookmess wurrd in dat Johr wedder an twee Daag de plattdüütsch Bookmess in’ Lichtwarksaal in de Hamborger Neestadt, Neanderstraat 22, mit Bestsellers, Neeerscheinungen, Lesungen as ok Präsentatschonen open maakt. Dorbi gifft dat aver ok veel Gelegenheit tohoop mit annern Plattsnacker to snacken or Bekanntschop to moken. An ’n Sünnavend, 5. November un an’ Sünndag, 6. November, is twischen Klock 12 un Klock 5 dorto Chanc’. Un dat gifft ok noch en bunt Programm mit Lesen vun bekannt Schriverslüüd. Kiekt doch eenmal ünner https://www.carltoepferstiftung.de/veranstaltungen/
To´n Enn noch´n lütten Snack:
De Einen säden: ´t is en Fluß
De Annern säden: Hexenschuß
De Drüdden säden: ´t is de Gicht
Ok Rheumatismus is ´t villicht
Mi dücht, de Nam´is einerlei
Wenn Einem dat Krüz deiht weih.
Fritz Reuter De Reis nah Konstantinopel