Moin leev Lüüd,
an 20. April weer de veerte Hamborger Plattdüütschdag. Mit mehr as 50 Utrichters in ganz Hamborg. En düütlich Bewies, dat dat Plattdüütsch ook wiederhen leven deit. Ook wi weern mit en “bunten plattdüütschen Blomenstruuß” dorbi. 43 Gäst weern uns Inladen folgt un hebbt denn gemeensam mit uns den Rükelbusch utwickelt. Inpackt weern: plattdüütsch Geschichten ut uns egen Schrievwarksteed, lütt Videos, Leder to’n Mitsingen un en Eidelstedt Quiz. Also en bunt Struuß nah dat Motto.
Dat hett de Lüüd vun uns Besöök un uns sülven bannig veel Spooß mookt.
Un wenn ji vun nu af an ook wiederhen mit uns Platt snacken wüllt: Wi draapt uns an jedeen tweeten Middeweek in ’n Maand in dat Gemeenzentrum vun de Elisabethkark, Klock söven. Kiekt mal in de Rubrik “Tieden”.
Un we hebbt wedder ook een sülvst schrevenen Text ut uns Schrievwarksteed dorbi.
Veel Spooß
Ut uns Schrievwarksteed
Ut de Plattdüütschfamilje:
De Hamborger Plattdüütschdag is vörbi. Överall hett Schriverslüüd wat vörleest, wurrn Leder sungen un mitenanner snackt. Un nu? De nächst Plattdüütschdag is eerst wedder in twee Johren. Aver veel öfter un ümmers wedder en nee Beleefnis, de Veranstaltens in´ Lichtwarksaal, in dat so nöömten Komponistenveertel bi de Michelis Kark.
Ik bün toletzt vör 14 Daag dor wesen. Dat hett sück lohnt – en plattdüütsch Lesen mit dree Hamborger Schrieverslüüd. Dat gifft aver ok plattdüütsch Leederavends, Diskuschonen mit Theaterlüüd, Lüüd vun Radio or Schrievers vun plattdüütsche Vertellens .
Ik meen man, dat lohnt sik. Kiekt mal in dat Internet ünner
https://www.carltoepferstiftung.de/veranstaltungen
.De Veranstaltungen köst ook nix un ji köönt na´n Lichtwarksaal goot mit de Bus or U-Bahn bet St. Pauli föhren. Veel Spaaß.
Tieden:
- De Plattsnacker dreept sik wedder an’n 08. Mai, Klock söven, in dat Huus vun de Elisabeth Kark, Eidelstedter Dorfstraße
- Middeweeken, 15. Mai, Beseuk op de MS Schaarhörn
- Seggt mi per Mail ebv-plattsnacker@t-online.de or ünner 571 93 466 (AB) Bescheed of ji or joon Frünn dorbi sien wullt. Man de Plätz sünd knapp! Also seggt glieks Bescheed.
To´n Enn noch´n lütten Spooß:
Ehrlich verdeent
De Deenstdeern warrt op de Stell rutsmieten. Wi se rutgeiht, smitt se de Hund noch een Teihn-Euroschien hen.
“Wat schall dat denn bedüden?” fraagt de Huusfro.
“Dat Geld hett he sik ehrlich verdeent”, meent de Kööksch.
“He hett man jümmers de ganzen Johren all de Töllers aflickt!”
