Rundbreef 60

Moin leev Lüüd,

„Slag in’t Kontor för de Plattdüütschen!“, dat is de Överschrifft vun de Bescheed vun den Bunnsraat för Nedderdüütsch to´n Koalitschoonsverdrag. Wat dat bedüüdt, doröver snackt wi bi dat Kapitel „Ut de Plattdüütschfamilje“. Dör künnt ji den ok lesen, as dat mit uns „Verkloorschiller“ wieder gaht. –

Un in de letzt Utgaav vun uns „Rundbreef“ hebb ik all op de Lesen mit Heinrich Evers in de Lichtwarksaal opmarksam mookt. Leest noch eenmal bi de Kapitel „Terminen“. –

To’n Sluss denn noch en Beed: Mi fehlt noch vun männich een de Anschrift, Telefonnummer un wenn ji hebbt ok de E-Mail-Adress. Schickt mi eenfach een Mail ünner mailto:ebv-plattsnacker@t-online.de   Denn kann ik jo t.B. bi Terminverschuven or anner Saken rechttiedig Bescheed geven.

Un nu veel Spooß bi dat Lesen

„Ut de Plattdüütschfamilje„

De Bunnsraat för Nedderdüütsch (BfN) hett sik op’n Koalitionsvertrag vun de niege Regerung mellt. In sien Pressebescheed vun’n 11. April 2025 seggt he: De niege Regerung schall mehr för Plattdüütsch doon! Mehr Rechte, mehr Stütt, mehr Präsenz in’n Alldag un in de Apentlichkeit mehr Platz kregen. Dat schall nich bloß’n Hobby blieven, man ok in’n Alldag Platz hebben. Dat is wichtig, dat Platt nich verlören geiht! Denn de Spraak is een Deel vun de Kultur un Identität in uns Region. Dorto mutt Platt mehr ünnerstütt warrn! Un düsse Hölp vermisst de Bundsraat in den Koalitschoonsverdrag vun de tokünftig Regeeren. „Twee Sätz sünd keen Programm“ is de trurige Kommentor in de Pressebericht. Leest eenmal sülvst: 

Stellungnahme des Bunnsraat för Nedderdüütsch zum Koalitionsvertrag

Un so heet dat denn ok: Snacken köönt wi all, man Doon is ’n Ding! – So´n „Ding“ hebbt wi denn man ok in Eidelstedt mit uns Verkloorschiller:

Weet ju noch?.- Letzt Johr harrn wi in en eerst Schritt an en Reeg Strotennaamschiller uns Verkloorschiller anbringen könen. Nu schall dat bi en tweeten Schritt 18 widere Schiller geven. Un dorna hebbt denn all plattdüütsch Straatennaams in Eidelstedt en hoochdüütsch Verkloren. Dat is uns „Ding“ un dorför bruukt wi Hölp. Hölp vun de Politikers un Ünnerstütten vun de Plattdüütsch Verenen un Organisatschonen. Finantschell ünnerstütten will uns ok ditmal wedder de Töpferstiftung. Un wenn dat in Eidelstedt henhaut hett, künnt wi düsse Akschoon villicht ok op ganz Hamborg uttodehnen. Heet dat doch in de Charta to´n Schutz vun de Minnerheitenspraken, de Spraak schall leven un för all Lüüd mehr apenkünnig weern. Un düsse Charta hebbt ok de Bunnesregeren un de Hamburger Senat ünnerschreven. Wi blifft an ’n Ball

 

Segeltörn Vollschiff STS MIR (Frieden)

Een vun mine beste Frünn weer swor krank un leeg in Krankenhus. Ick heff em holpen so good as dat gung. Veele Wochen later stunn he wedder op twee Been. As Dankeschön hett he mi överrascht und mien grötsten Wunsch erfüllt. Ick wull so geern mit een Tallship een Törn seiln, as Trainee. He schenkt mi een Segeltörn op dat Vollschiff vom 10.05. bet 16.05.1997.

Boarding weer an Hobengeburtstag, mit Seesack un grote Opregung. Nahsten Dag Auslaufparade, de Törn gung nu los. De Elv rünner no Cuxhaven dann in de Nordsee und dor gung dat richtig los! – Dat weer keene Luxusreis, nee wi Trainees mussen arbeiten: Wachen gehen, Küchen- und Putzdienst, ok Segelkunde jeden Dag. 12 Trainees deelt sick eine Kabine/ Kubrik, Jungs un Deerns tohop. Dat weer lustig, meist as sonne Klassenreis. Slopen ward in Kojen.

Dat Wetter weer good Sünn un Wind, so ward alle Sails set. Dat Schip harr 50 Mann Besatzung und 60 Trainees. To kieken nur Water un See. Immer an Dänemark längs. Drept wi annere Schips wer jümmers een tuten und tril­lern, denn de Mir seh schmuck ut ünner volle Sails. Ich heff sogor dat Ruder bedeent, man ick heff scheune Schlangenlinien achterrut loten, dat ich nich so licht. Dat Schip ist 108m lang und 14 m breet, Masthöhe fast 50 m und dorvon 3 Stück.

Nu keem de Part um Skagen!!!!!

Wi leech in uns Kojen und dat Gewitter mit Storm und Regen keem schneller as wi dacht hebt. Just een Krachen und Donnern, dono Sirene Segelalarm, alle Mann an Deck!!!!Rin in dat Öltüg un de Gummistebel un rut. So keem de Befehl „ Segel bergen“ alle an die Taue un immer im Takt ziehen. No tein Minuten weern wi klöternatt, dor help ok keen Helly Hansen mehr. So clock 6 harrn wi den Sails an Deck, dor seh dat ut as weer ne Bomb explodeert. Taue, Taue und kaputte Sails. Dat unser Ship noch stark rollen de, hebbt wi vor luder Opregung nich markt.

Twischendörch harr de Backschaft den groten Samowar ansmeten und wi kun­nen uns im Spisroom opwarmen. Dorno möt wi all oprümen und wi harrn all doch teemlich wacklige Been vun düsse Obentür. Middag neegst Dag hett de Mannschaft de niege Sails anschlogen, wor nich so licht, bi de unruhige Dünung. Bit ton Avendbrot leep allens wedder rund.

Dat weer min Erlebnis im Skagerack. In Sonderburg weer de Reise to end, 721 Seemeilen von HH über Skagen nach Sonderburg

En dull Reis ahn Luxus, aver mit fründliche Lüüd. Disziplin wurr hollen. Wi hebbt uns later noch en paar Maal drapen un hebbt ümmer Spaaß hatt.

Margrit Wichmann

De Rechtschrieven is vun de Schrieversfro övernahmen worrn. Margrit is aktive Plattsnackerin bi de Eidelstedter Krink.

Höörböker

Hier noch een lütten Spaß vun NDR Podcast: „Neue Mieter“, vertellt vun Wolfgang Sieg ca. 5 Min.

• De Plattsnacker dreept sik  wedder an’n 14. Mai, Klock Söven, in dat Huus vun de Elisabeth Kark, Eidelstedter Dorfstraße
• 22. Mai, Klock Söss, Lichtwarksaal, Neanderstraße 22,  Mit Witz un Ernst ut Ostholstein. – De Plattdüütschbeauftragte vun´n Kreis Ostholstein, Heinrich Evers, leest ut sien niegst Book „Nu is aver goot!“. He hett ok sien  Akkordeon mit un laadt all hartlich to’n gemiensam plattdüütsch Singen in. Dat köst ok nix. Ji mööt jo aver mit düsse Link anmellen;

Heinrich Evers

Wi draapt uns denn üm veertel vör Söss vör den Lichtwarksaal.

To´n Enn noch een lütten Spröök: