Moin leev Lüüd,
dor weer bannig wat los, bi de Plattsnacker.
Toeerst hebbt wi uns Gerd Tschüüs un Dank seggt, för sien Stütt un Hölp bi uns lütten Krink. In de teihn Johren bi de Gerd bi uns de Baas wer, hebbt wi veel lehrt un mehrstendeels jümmers een Barg Spaaß un Freud hatt. “Velen Dank Gerd!“
Un letzt Sünnavend weer denn to’n tweeten Mal uns Lesen in de Eidelstedter Bökerhall.
Plattdüütsche Vertellens ut Eidelsteedt un annerswo her –
Leest or schrieven vun Lüüd ut Eidelsteedt
As anseggt harrn wi ditmal to meist Geschichten vun Eidelstedter Plattschriever rutsöcht. Vörlesen wurrn de Vertellens vun de Lüüd ut uns Krink “de Plattsnakker”. Un veelmals weern datt dann ok de egen Geschichten, de se sülvst schreven hett. – Dat Besünnere för mi, weern aver nich blot de egentlichen Geschichten, sünnern de Överraschung bi dat kloormaken vun de Lesen, woveel Eidelsteedter noch plattdüütsch snackt un ok egen Geschichten schrievt hebbt. Dat hett richtig Spaaß mookt un schall uns andrieven, wiederhen de plattdüütsche Sprook to plegen un gemeensam plattdüütsch to snacken.
Un noch wat gifft dat to vertellen:
Letzt Week hebbt wi uns nochmal mit de Lehrerinnen vun uns “Plattdüütsch Kinner” vun dat Gymnasium Dörpsweg drapen. Na dat eerste gemeensam “Kennenlernen” wüllt wi nu eenfach mal mal versöken, na de Sommerferien mit en Grupp interesseert Schöler Plattdüütsch to lehren un gemeensam to snacken. De Reakschonen na uns Proovstünn weern op jeden Fall so, wo man sik över freien kann. Wi probeert dat eenfach mol.
Toletzt noch de Link vun de School vun uns letzt Besöök
https://gd.hamburg.de/2023/05/30/plattdueuetsch-snacken-maakt-spaass/
Plattdeutsches Wort des Jahres 2023: Das schönste plattdeutsche Wort heißt: „Fräden“ – Frieden!
De Wettstriet üm dat schöönste Plattdüütsch Woort gifft dat siet 1995. Ünnerdess versteekt sik achter dat Plattdüütsch Woort dree Kategorien un de Wettstriet wurrd tohoop vun dat Fritz-Reuter-Literaturmuseum un den Heimatverband Mecklenburg-Vörpommern dörchföhrt.
Dat Plattdüütsche Woort is in düsse dree Kategorien söcht worrn:
• dat fienste plattdüütsche Woort
• de best aktuell plattdüütsch Utdruck (en Neeschöppen so to seggen)
• de leevste Snackwies or dat leevste Spreekwoort.
All in de letzt Johren hebbt sik de aktuellen Begeefnisse ok in de Wahl vun dat „Plattdüütsch Woort“ wedderspegelt, as in de Corona-Johren. So düütlich as in dat Jahr is aver noch keen Stimm dör de Jury utfallen. Dat wichtigst Thema vun uns Tiet, de Fraag na Krieg un vör allen Freden speel ok bi dissen schienbor so unpolietschen Wettstriet en grote Rull un keem gliek in twee vun de dree Kategorien vör. De Jury hett hör Oordeel afgeven:
Dat schöönste plattdüütsche Woort heet: „Fräden“ – Freden!
In de Kategorie vun aktuell Utdruck wunn dat Woort: „Bregenplietschmaschin“ – de künstliche Intelligenz, KI.
In de Kategorie Redensart leeg mit groot Afstand: „Lewer dröög Broot in’n Fräden, as Kauken un Braden in Striet.“ .
Mehr as 200 Inschickens hebbt de Veranstalters kregen. Dorbi keemen de Inschickens ut ganz Düütschland. De jüngst Mitmakerin bi de Wettstriet is veer Jahr, de öllste Deelnehmers sünd wiet över 90 Jahr oolt. Schöön; en jümmers grötteren Barg vun Vörslääg vun jung Lüüd. Dor hebbt to’n Bispeel Kinnerkurse för de ganz lütten Plattsnacker un sogoor Kitas Vörslääg to dat Plattdüütsche Woort vun dat Jahr inschickt.
De Link för dat Thema: 6. Juni 2023 In Allgemein, Kultur, Preise und Auszeichnungen
Tieden:
De Plattsnacker dreept sik wedder an’n 12 Juli, Klock söven, in dat Gemeendehuus vun de Elisabeth Kark, Eidelstedter Dorfstraße.
To´n Enn wedder ´n Limerick:
En Schipper vergneug sik in Jever
Mit Froons un mit Snapps op sien Ewer.
Mitmol – Schreckenswoort:
“Minsch, Mann över Boord!”
(Veel slimmer: een Boddel Genever!)
Claus Günther