Moin leev Lüüd,
dat is ja nu bald Wiehnachten. Vörher aver kummt noch de Nikolaus to de Kinner. – Dor, wo ik to Huus bün, gifft dat en schöön Traditschoon. Un dorto is mi düsse Geschicht infallen, de sik teemlich nau so tobröcht hett. Ik heff si op Plattdüütsch schreven, denn dat is för uns de Heimatsprook vun Noorden. Un de Sprook is ok een Deel vun uns Traditschoon.
Traditschoon in´n Grootstadt
Uns Siedlung fiert Jubiläum – 70 Johr. Un meist so lang steiht ok all de 6. Dezember as Termin för de Besöök in uns Quarteer in dat Adressbook vun´ Nikolaus. Denn bringt he den Kinner lütt Geschenken, Söötigkeiten un anner schöön Saken.
Vörher mutt he aver de Gaven vun de Nikolauswarksteed afholen. De Adress kennt de Nikolaus al. Warrt dor nu al siet mehr as dörtig Johr de Wunschzeddels vun de Kinner sammelt un lütt Gavens inpackt. Dat is veel Arbeit un dorüm gifft dat dor ok lang vörher röögsam Bedrief.
Ganz to Anfang, as uns Siedlung noch nich so groot weer, keem de Nikolaus noch mit Peerd un Wagen. Dor weer he ok noch alleen. Aver Johr för Johr hebbt jümmers mehr Kinner töövt. De Nikolaus harr Hölp nödig. Hüüt is he nich mehr alleen. He hett Ünnerstütten kregen. Engels un mehrere Hölpslüüd mookt sik tohoop mit em op´n Padd.
Eenmal aver seh dat meist so ut, dat de Lütten vergevens töven mööt. Den Nikolaus deit dat nich goot gahn, un he kunn dütmal de Siedlung nich sülvst besöken. De Klabauters trurig moken güng aver ok nich. En Behölp is söcht worrn – en Vertreder or ´n Vertrederin. En Hölpsfru ut de Nikolauswarksteed wurr nu de „Nikolaus“. Rode Mantel, witten Boort un en dick Küssen ünner de Mantel mookt se to en echt dickbuuksch Nikolaus. Richtig drall un propper weer nu uns Hölperin, würklich as de echte Nikolaus. Blots oerntlich gahn kunn uns Nikolaus nich. Bi jedeen Pedd deit dat Küssen rutschen. Vörn in de Büx kunnst dat ok nich steken. De Küssen weer eenfach to dick un de Gürdel drümrüm to eng. Wat nu? Büxendräger? Dat funschoneert nich! Woneem schall man de fastmoken? Tüchnadels? Ok keen gode Idee! De ritt ut un de Küssen fallt rünner. Also doch dat Küssen mit de Gürdel, bloot wat lockerer. Dorbi aver besünners wichtig, wenig röhren! –
De Plaan weer goot, bloot bi de Praxis weer dat noch an hapern. Denn aver ok hier de reddend Infall: en oolt Bollerwogen, dwarsröver en dick Brett as „Sessel“ för den Nikolaus. Smückt mit Dannentwelgen, un op´n Slag wurr ut den Bollerwagen en smuck kommodig „Nikolauskutsch“.
De Engel hebbt de Kutsch trocken. De Nikolaus sitt bavenop in de „Sessel“ un höllt sien“ Küssenbuuk“ fast. Nix deit rutschen un nüms harr wat markt. Ok nich, dat de Nikolaus hüüt nich so „deep brummen“ deit as de Johr tovör.
Aver dat wichtigste kummt natürlich an´ Sluss: All Gedichten un ok de mitgeven Wunschzeddels hett de Nikolaus sorgfolig sammelt un an nächsten Dag in de Schrievstuuv vun den Wiehnachtsmann afgeven. Frohe Gesichter un veel Spaaß mit de Geschenken ünner de Dannenboom weren denn de Bewies, dat de Nikolaus un de Wiehnachtsmann de Zeddels vun de Kinner heel nau leest hett.
Ut de Plattdüütschfamilje:
Bökers un Snacken – de plattdüütsche Bökermess
Meist 40 Verlage un Institutschonen weren an 5. un 6. November in`n Lichtwarksaal in de Neanderstroot vertreden. Dorbi weern ok veel vun de Schrieverslüüd, de ut her Bökers vörleest hebbt. Jüst so wichtig as de Bökers is dorbi dat Drepen un een lütt Klöönsnack mit Lüüd, de so as wi plattdüütsch snackt. Ok Maten vun uns Krink hebbt vörbikeken.
Plattdüütsch Thinktank in de Nedderdüütsche Bibliothek in Hamborg
Dor weer fix wat loos in de Plattdüütsche Bibliothek in de Peterstraat. Bummelig 20 Lüüd ut ganz Noorddüütschland sünd an´n Sünnavend, den 22.Oktober op Inladen vun’t Nedderdüütschzentrum in Holsteen un dat Nedderdüütschsekretariat tohoopkamen un snacken över Plattdüütsch in de Kulturlandschap. Dat Besünnere: De Öllerswoorpunkt leeg jichtenswo twüschen Enn vun de 20er un Midde 30. Plattdüütsch un junge Musik weer dorbi en wichtigen Aspekt. Man besnackt woor ok, woans een de Spraak sichtborer maken kann un wodennig Plattdüütsch ok en prominenteren Platz in de Medien kriegen kann. Dat hett de Lüüd gefullen. Dorwegen schall dat in’n November al dat neegste Drepen geven. Ji seht, Plattdüütsch is nich bloot wat för öllere Lüüd. Ok bi de Jüngeren wurrd dat nu wedder beleevt un ok för moderne Musik un Kultur bruukt. Kieckt ok mal ünner https://www.plattbeats.de/
Tieden:
De Plattsnacker dreept sik wedder an’n 14. Dezember, Klock söven, in dat Gemeendehuus vun de Elisabeth Kark, Eidelstedter Dorfstraße. Dor is dat denn nich mehr all to lang hen bit Wiehnachten. Dorüm wüllt wi an düssen Avend en lütt Adventsfier moken.
To´n Enn noch´n Opgaav to´t Nadenken:
rechter Mausklick – Grafik kopieren und ausdrucken
/