dat weer en dull Beleevnis: Scheep bekieken in Schulau. 16 Lüüd vun uns harrn sik op den Padd moot. En lütten Bericht un ok en kort Video staht op uns Internetuptritt ünner www.eidelstedter-buergerverein.de. Aver ok uns Drapen findt nu wedder regelmatig statt un uns Krink is na de överstahn „Corona-Beschränkungen“ sogoor wussen. Welk nee Gesicht is bi uns to sehn un vör allen bi dat Snacken to heuren. Denn platt snacken mookt tohoop in de Gemeenschop dubbelt so veel Spaaß. Faken wiesen uns niege Plattsnacker ok annere Ideen un Anregungen. Dat mookt uns Tohoopkamen lebennig un lett uns Krink as Gemeenschop wieder tosomenwassen. Aver nich bloot uns nee dortokomen Plattsnacker helpt mit ehr Ideen, nee, elkeen vun uns kann „mitmoken“. Jedeen, de en Idee, Anregung or en anner Vörslag hett, „rutt dormit, vertellt uns dat!“. Loot uns doröver snacken un villicht warrt dat denn en „dull Ding“. Dat Telefon un dat E-Mail Fack stohn jümmers open. Aver ok en „Leserbreef“ in uns Maandberichten De Plattsnakker vertellt kunn neeje Ideen to plattdüütsch Themen wesen.
Ik deit mi freien
Klaus-Peter
Ut de Plattdüütschfamilje:
Siet 1976 begeistern de Aventüer vun de Abrafaxe Maand för Maand Junglüüd un ok öllere Lesers. As ehr Vörgänger sünd de Abrafaxe dree Wichten, de in afsünnerlich Brochen de verscheden Länner dör Reisen besöken. Na 561 Heften kommt nu wat Nees: De Abrafaxe snackt Platt in de Hansetiet.
Keen nu de original hochdüütsch Aventueer vun de Abrafaxe ut de Hansetiet in dat fröhere Jahrhunnert twüschen Lübeck un Rostock, Köln un Nowgorod to Hand nimmt un mit de nee nedderdüütsch Utgaav vergliekt, warrt faststell`n, dat en „Een to een“ Översetten nich is. Dor güng ok nich, so Autorin Bimmel: „Man mutt dat richtig nee denken. Anners warrt dat nich goot.“
Un goot is dat worrn. So leest dat sück, wenn bispeelswies Brabax platt snackt: „Nu man Tau! Höllen ji de Ohrn open. Wi drepen uns hier in Lübeck wedder. Califax un ik warden uns in Rostock ümhüren. Villicht kriegen wi wat över de annern rut, de wat vun den Schatz weten.“
Villicht is dat ok en Geschenk för de Lüften, de denn mit Oma un Opa op plattdüütsch op Schattsöök gahn. Mehr Henwiesen find ji in Internet ünner https://www.ndr.de/kultur/norddeutsche_sprache/index.html
Veel Spaaß!
Henwiesen un Winks:
- Siet över een Jahr gifft dat nu al de Ohnesorg ehr lütte plattdüütsche Lehrschool Platt2Go in dat Internet. 28 Folg achternanner sünd dat al. Un dat geiht wieder. Anhand vun de aktuellen Theaterstücken wurrd Begrepen un Reedwennen verklort, aver ok op besünner „Fallstriek“ bi de Utspraak/Betonung or in de Grammatik henwiest. Dat is nich „langwielig“ School. Nee, dat is humorvull un mookt bannig veel Freid. Kiekt dat jo eenfach mol an. https://www.youtube.com/watch?v=OibHqqoe3fQ
-
Över 2 Millionen Lüüd in Düütschland snackt platt. De groten Deel vun jem leevt in Noorddüütschland. Middewiel steiht de Spraak an eenig Scholen in Noorddüütschland ok wedder op’n Lehrplaan. Mit dat nee Magazin „De Noorden op Platt“ hebbt de NDR den Feernsehkieker en nee’en Gelegenheit, dat plattdüütsch Leven in de noorddüütsch Bundslänner wies to warrn. Dat Magazin wiest, wat in de Szeen passeert un stellt Minschen vör, de dat Plattdüütsch an’t Hart liggen deitt. Dorto kommt plattdüütsche Reportaaschen ut den heel Noorden. In de Rubrik „Mommsen ünnerwegens“ präsenteert Detlef Rutsnig mit sien Handpopp „Werner Mommsen“ op sien ganz egen Wies Vertellens un Geschichten ut dat plattdüütsch Leven.
To sehn is dat jedeen letzten Sünndag vun een Maand af Klock halvig twölf in‘ NDR Feernsehn, dornah is de dörtig-minütige Sennen in de ARD Mediathek ünner https://www.youtube.com/watch?v=oibhqqoe3fq to bekieken.
Leserbreef:
Tieden:
De Plattsnacker dreept sik wedder an’n 14. September, Klock söven in dat Gemeende-huus vun de Elisabeth Kark.
To´n Enn noch´n lütten Snack:
Över ’n groten Moors höört ok ’n grote Büx
heet dat ironisch vun de Angever.
