De Plattsnakker

| Keine Kommentare

Moin,

wi, dat sünd de Plattsnakker vun den Eidelstedter Börgervereen. Siet över 10 Johren dropt wi uns jedeen tweeten Middeweken in’ Maand un nu all mehr as 2 Johr in dat Seniorenzentrum vun de Elisabeth-Kark in de Eidelstedter Dörpstraat. Klock söven an´n Avend geiht dat los, denn warrt Plattdüütsch snackt, warrt Geschichten leest, Döntjes vertellt oder ok al mal en plattdüütsch Leed sungen.

Plattdüütsch is en smucke Sprook. Dat kling so kommodig, mookt veel Spaaß un mannigmal kann man veel mehr graadto seggen as op Hochdüütsch. Meist sünd wi üm un bi 12 bit 15 Lüüd. Dat is jümmer weer ünnerscheedlich. Elkeen is willkommen. De Spaaß un de Freid staht bi uns in’ Vördergrund. Wi all sünd nich perfekt. Nüms mutt sik scheneern, wenn he sik mol verdoon het, dat richtige Woort nich infallen deit or he mit en Snack op´n Buuk fallt. Keen Bang – wi all övt noch, aver snacken hölpt. Un dat gifft bi uns ok en „Schoolmeester“, de wiederhölpt. Gerd heet he un Plattdüütsch snackt he siet sien Kinnertiet. Un dat gifft ok veel to vertellen, denn he hett ok lang Tiet as so nömmt „Begrötnkoptein“ an dat Willkomm-Höft in Schulau Scheepens begröt. Dor gifft dat denn jümmers wedder en Döntje ut de „Seefohrtiet“ to hören. Leest mol de Bericht vun uns Besöök in Schulau.

Wi goht aver ok gemeensam „op plattdüütsche Entdeckungstour“ – Theaterbesöök, Utstellungen, plattdüütsche Lesungen or ok in een Pop-Konzert op Plattdüütsch. Dat is also en bunt Programm. De Termine un noch veel mehr aktuelle Berichten ut de „plattdüütsche Familje“ findt ji op düsse Siet bi de Rundbreefs. Eenfach mal rinkieken un lesen.

Plattdeutsch leevt un is nich nur wat för öllerhaftige Lüüd. Nee, jedeen is willkomen.

Nächst Maal draapt wi uns an´ 10. August, 14. September, 12. Oktober un denn wedder an` 09. November. Ik freu mi, wenn ji mol rinkieken doot un ook mol op´n Padd mitkomen wöllt.

Klaus-Peter

Schreibe einen Kommentar

Pflichtfelder sind mit * markiert.