Utgaav 23 – 25. März 2022
Moin leeve Lüüd
10 Johren gifft dat nu all de Plattsnakkers in’ Eidelsteedter Börgervereen. Dat is en lang Tiet un wiels sünd wi en fast Inrichten in’ Stadtdeel wurrn. Un dorbi wöörn wi nich de Eersten. Plattsnacken hett in Eidelsteedt al en lang Traditschoon. Grund noog, an den 23. April bi den 3. Hamburger plattdüütsch Dag dorbi to ween. Ünner dat Motto „Wi snackt platt!“ Wüllt wi plattdüütsche Schrievers Lüüd ut Eidelsteedt vörstellen un ehr Vertellens vörlesen. Dor gifft dat ton Bispeel de Erinnerungen „Vun un üm uns Möhl in Eidelsteed“ vun Gerda Geduhn. Un uns jümmers noch röhrig Senior Günter Grell besinnt sik op de Schooltiet in de Elbgaustraße. Bavento vertellt he uns över sien Belevnisse un dat Leven vun domaals un hüüd hier bi uns in Eidelsteedt. Aver ok Vertellelns vun Thies Meester, alias Will Schüssel, un de Hamburger Geschichtenschriever Gerd Feldhusen hebbt wi dorbi. Gemeensam mit all hier nich nömmt Plattsnackern un Plattschrievern hebbt se dat Plattdüütsche in Eidelsteedt föddert un an´ n Leven hollen. Disse Traditschoon wüllen wi fortsetten un dorüm sünd ji all an’n 23. April inlodt, bi´n Platt snacken dorbi to ween.
Ik frei mi
Ut de Plattdüütschfamilje:
Uns Börgervereen hett sien Internetoptritt neeg mookt. Nu sünd ok wi as Plattsnacker mit en egen Siet dorbi. Dor gifft dat nich blots Henwiesen op uns gemeensam Drepen, sünnern ok op besünnere Veranstaltungen or ielig Termine.
Un dat is nich blots en Eenbahnstraat. All, de wat Neeges to weten kriegen hebbt or en Tipp geven wüllt, köönt sik mellen. Denn kriegt dat all to lesen un to weten. So blifft de Websiet jümmers aktuell un för uns all intressant.
Tieden:
>>>De Plattsnacker dreept sik wedder an’n 13. April, Klock söven, in dat Gemeendehuus vun de Elisabeth Kark.
>>>An´n 29. April gift dat dann wedder ne´e neege Utgaav vun de “Plattsnakker vertellt”.
Henwiesen un Winks:
Plattsnaker ut Eidelstedt sünd nich bloot bi uns aktiv, sünnern ok annerwegens, as bi de plattdüütsche Speeldeel in Norderstedt, dat TANKS THEATER, Kartenhotline: 040/ 681825. Villicht hett de een or anner Lust op en fröhlich Theateravend.
To´n Enn noch´n lütten Snack:
Een Schuufkarr vull Glück helpt beter as´n Wogen vull Verstand.