Wi snackt platt

| 1 Kommentar

Wi snackt platt!

„Snack mal wedder Platt!“ singt de Finkwarder Speeldeel. Un dat höört sik so schöön an. Dat is een richtig Freid, totoheuren. Un dat hebbt ook de Lüüd in uns Börgervereen meent.

Platt heuren un Verstohn, dat kunn se jo, aver platt snacken, dat mutt noch övt warrn. Un dat wullt se denn jo ook. So sünd De Plattsnakker in Eidelstedter Börgervereen boorn worrn. 10 Johr is dat nu all her, dat wi tosamen an´t platt snacken sünd.

Aver, wat snackt wi denn egentlich? Een Dialekt, een Spraak vun de „einfachen“ Lüüd or sogar „vulgär“? Nee, we snackt Plattdüütsch un dat is een egen Sprook.

Dat is all lang her, dor hebbt in Norddüütschland meist all Minschen platt snackt. De grote Tiet von dat Plattdüütsche weer de Hanse. Kiekt mol op dat lütte Video

Un hüüt?

Lann Tiet weer dat gor keen Fraag, dat in de Familien de Lüüd Platt snackt. Man so löppt dat aver nu nich mehr. In mien Böker steiht, dat blots noch 14 Perzent vun de, de in den Noorden to Huus sünd, good or bannig good Platt snacken könnt. Dat sind över´n Dumen 2.500.000 Minschen. Verstohn köönt de Spraak aver een Barg mehr.

Wenn Lüüd Platt snackt, denn in de Familie or mit Frünnen. Tomeist snackt aver veel mehr öllere Lüüd as jüngere Plattdüütsch. Lange Tiet hett dat ja ok heten: „Wenn du wat warrn wullt, muttst du Hooch snacken.“ Platt weer bräsig un nich „salonfähig“. Middewiel hett sik de Wind aver en beten dreiht. Dat Motto heet:„Uns plattdüütsche Spraak leevt!“ Un Plattdüütsch is ok nich nur wat för öllere Lüüd.

Johr för Johr kamt üm un bi 150 nee´e plattdüütsche Böker rut: Gedichten, Geschichten or ok Kinnerböker. De meisten sünd op Platt schreven worrn, man mehr un mehr warrt ok översett: Pipi Langstrumpf, de lütte Prinz, Asterix or Harry Potter. Un dorför, dat dat ok in Tokunft so blifft, is dat wichtig, dat ok de Kinner wedder mehr mit Pladüütsch in Kontakt koomen deit. An’n besten al in’n Kinnergoorn. Ok wi weer dorbi un hebbt dat Kinnerbook „Das kleine Wir“ översetzt.

Dat lütte Wi

Un för all de, de geern mehr op Plattdüütsch mit Kinner maken wüllt, för de gifft dat nu ne’e Broschüür. “Snickemuus un Spaddelkeerl” , rutgeven vun dat Niederdeutschsekretariat https://www.niederdeutschsekretariat.de/.

Aver ok in de School ward Plattdüütsch ünnerrichtet. Dorbi hett Hamborg in´n Noorden de Nees vörn.

Vermootlich mehr as 2000 Schölers leern opstunns in Hamborg Niederdüütsch. In teihn Grundschoolen warrt se ünnerichtet.

Ji markt, Plattdüütsch leevt un mookt Freid!

De beste Reklaam für dat Plattdüütsche is aver, de Sprook to snacken. Schangs gift dat rieklich, ok in Eidelstedt. An 23. April is wedder de Hamburger Plattdüütsch-Dag un ok wi sünd dorbi. Vun Klock Dree an hebbt wi in de Eidelstedter Böökerhall een plattdüütsche Lesung. Dat kost ok nix. Kiekt mol op dat Plakat.

Sünst drapt wi uns jeeden tweeten Middeweken in Maand, Klock söben in Gemeendhuus vun de Elisabeth-Kark. Wi all sünd nich perfekt, wi all övt noch. Aver dat mookt veel Spooß un Vergnögen. Besöökt uns doch mol, or schrievt een Mail. Ji köönt aver ok anropen.

Ik frei mi. – Vun Harten willkamen.

Klaus-Peter

Mail: plattsnakker@eidelstedter-buergerverein.de

Tel.: 040 571 93 466 (AB)

Ein Kommentar

Schreibe einen Kommentar

Pflichtfelder sind mit * markiert.